港股噚日一度狂升，之前仲驚緊股災嘅散戶，已經唔記得乜嘢叫驚，仲諗緊恒指有機會再創新高。當然唔係個個都唔識驚，ngaiwaihung就話：「今日炒股嘅遊戲規則，就係『你驚我唔驚，你唔驚我至驚』。」咁又有幾多人識驚呢？
Chun_Nico1980係其中一個，佢話：「當人人識驚，跌市沽貨時，就要勇字當頭，入市掃貨。」吓原來佢都係唔知驚嗰個！
驚升得快跌得仲快
Marvinhung就話：「家吓個個都唔識驚，唔信有股災，好多人都只係話技術性調整。」Vaio_dick亦睇淡後市，「首先北水南調呢個概念，都翻炒過好多次，唔係乜嘢新消息。其次，呢兩日嘅升勢，多年嚟少見，真係好詭異；第三，外圍尚未穩定，日圓仍強勢；再者睇三色台，天津嗰邊負責投資自由行嘅銀行，自己都唔知發生咩事，所以一句到尾，小心升得快，跌得仲快。」
聰兒亦話：「盲嘅都知道係造市啦，邊有可能幾日升咁多啫。」patrick1021插口：「擺明啦！家陣散戶高追只有死路一條。」
家陣高追死路一條
firstloveboy認為：「清倉散貨都係投資決定嘅一種，唔買又唔使死嘅！」Wiyoma就陰謀論咁諗：「會唔會嗱嗱臨谷爆個市，出年年頭股市先重拾升軌，迎接奧運？」MakingChun就冇有怕：「呢個世界做乜嘢都要博嘅，博到就有將來，博唔到就真係輸甩褲。」
http://www.uwants.com/viewthread.php?tid=4715271&extra=page%3D3&page=3