港股真係勁，花旗升兩百幾，恒指升1208點，由上個禮拜五低位足足升咗2000幾點，但實情係港股好波動，同勁唔勁冇關。
喺低位彈番咁多，跟住個市會點？有幾個可能，好快就跌番落去試20760，守得穩就再向上試關，守唔穩就再跌過，再試吓條250日線，又或者繼續抽上去，不過要升破22300一啲都唔容易，如果抽上去再撻番落嚟，穿埋條100日線，咁樣後市就Noeyesee，或者第3個可能性大啲，就係喺千零點嘅範圍裏面反反覆覆，等消息突破，不過，睇花旗嗰邊嘅信貸危機仲有排煩，港股遲啲再試250日線機會高啲。
暫時嚟睇，只要花旗唔出現新嘅壞消息，港股仲可以炒個別，𠵱家波幅大，就算維持小注短炒策略，回報都可以好吸引。
和黃C輪2498：和黃（013）昨日報收76.40元，全日走勢好硬淨，過兩日公佈業績，應該可以食住個勢升上78至80元，可以買啲和黃C輪2498，昨收47.5仙，有效槓桿率8.1倍，正股升上80元，2498應該喺69仙樓上，正股跌穿74元就沽貨計數。