噚日個市喪升，與其話係受外圍帶動，倒不如係話阿爺開放買股「個人遊」所致，尤其下午後半段時間，中資股簡直出現「恐慌性」買貨情況。今次中央開放以個人身份來港買股票，理論上只有天津一個試點，但實際上稍後只要中行（3988）其他的境內分支機構與天津的中行簽訂協議，都可以個人身份買港股。
相信以上消息經廣泛報道之後，今日大家先知原來消息真係咁正。香港股民可以早着先鞭，最先諗到除咗受惠成交上升嘅港交所（388）之外，一定係買較A股折讓大，同時又出名嘅國企H股，因為國內人唔多認識香港二三線股，正如港人都唔多識國內嘅二三線A股。
比亞廸有分拆概念
第一浸肯定係成交額大又多人識嘅H股，國壽（2628）、平保（2318）較A股折讓分別有40%及34%，賭折讓收窄至兩成都大把水位，中行折讓44%，而且日後有大量證券交易及相關收入，必買。另上周突然轉強嘅儀征（1033）以及上石化（338）都要買，兩股折讓都逾7成，相當誇張。至於成交較細而折讓達70%嘅東北電（042）及熊貓電子（553），相信會喺第二浸炒上。
另一種要買嘅中資股係未有A股嘅國企，經典例子係中交建（1800），比亞廸（1211）亦係有H無A，該股早排屢被大行調高評級與目標價，如大摩對比亞廸評價就頗高，指該股正處於多年增長期的早段，料未來3年盈利增長達92%，預期比亞廸今年汽車付運量增長67%，明年增長40%，而營運槓桿亦見提升力，目標價睇66元，現價有19蚊水位。該公司亦有分拆概念，擬分拆上市的比亞廸電子上市雖然一波三折，但市場消息指公司正力爭第四季上市。