美國人洗腳唔抹腳，搞出次按風暴呢個大頭佛，拖累全球股市。其實一個好嘅理財計劃，要由家庭出發，好似呢個大陸網友咁，自己使大咗，低聲下氣向老婆大人申請「貸款」；各位為人妻嘅，要學吓呢位太太批核前要查清楚，仲要約法三章，千祈咪學美國銀行亂咁借貸。
列明開支寫信申請
親愛的老婆大人：
俗語話「一不離二，二不離三」，近月自己嘅開支大咗，入不敷支，財政出現赤字，原因係公司同事阿明結婚，做人情使800；阿傑嘅細路滿月花300；老王外母過身又使100；同舊同學敍舊食飯，用咗500；幫個仔交補習費，唔見800。現申請借貸500，以度過本月最後幾日，借款期限半個月，利息為朱古力一盒。
望予審核、批復為盼，急盼中，謝謝！
愛你的老公上
經查核開條件批出
親愛的老公：
《申請》已經收到，經調查，情況基本屬實，並沒有在外花天酒地亂花錢。
但有兩樣嘢要提醒你：一係阿明結婚，人哋畀500，但你就「懶」豪畀800；二係同朋友食飯，普普通通一餐就得啦，點解要扮大牌食法國餐。所以，你要記住，如有下次，要先同我商量。
另外有3個要求：
首先，你最近講嘅說話，越嚟越粗俗，一啲都唔溫柔體貼，要多啲講好說話氹我。
第二，以後唔好叫我老婆，要叫「Dear」或者「寶貝」之類，再唔係可以叫聲阿媽，因為你實在太唔識照顧自己。
第三，以後喺街度見到靚女，千祈唔好眼都唔貶，你仲記唔記得我哋㗎車上次點解會撞㗎！
你要嘅錢已經放喺西裝袋度，嗱，今次畀夠600蚊，以後慳啲使喇；如果係100蚊以下嘅借貸，唔使再打報告寫信，直接同我講啦。
愛你的老婆
http://big5.xinhuanet.com/gate/big5/forum.xinhuanet.com/detail.jsp?id=46417609
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]