巴西球星朗拿度癡肥之謎終於解開，之前傳媒鬧佢大食夾爛滾搞到變「肥哨」，其實係寃枉咗佢。米蘭實驗室醫生日前話，朗拿度新陳代謝出問題，先30歲仔要孭住個車胎。
查出新陳代謝有問題
據醫生講，「肥哨」甲狀腺素分泌太少，通常出現疲勞、體重增加、減肥冇效，同埋頭髮亁旱嘅現象。唔怪得朗拿度近年場上腳軟、體形急速膨脹啦！我求大俠仲成日鬧佢自甘墮落，真係過意唔去喇！
實驗室搵到病因後，一於制訂食譜打針食藥，幫「肥哨」除低車胎，過去3周喪減3.5公斤；𠵱家佢成個輕盈晒，自信返晒嚟！如果我係蕭生嘅話，實搵佢做代言人，總好過靠晒整容3女齋攻女士市場咁窄嘛！
留長頭髮迎新球季
我求大俠醒起「肥哨」之前突然留頭髮，好可能同治療有關。因為黑人頭髮又鬈又亁，留長髮通常要紮辮仔，大多數都係選擇鏟光頭唔使煩。「肥哨」眼見一頭亁草變得軟熟，新球季咪決心以長髮示人囉！
球星外表固然緊要，但落到場都係講實力。我求大俠希望「肥哨」瘦身後，可恢復98年世界盃之前嘅水準，咁樣唔單止球迷有眼福，AC米蘭分分鐘唔使燒銀紙買「細哨」，咁就認真慳水又慳力啦！係咪？
話說回頭，「肥哨」瘦唔到係新陳代謝出問題，咁有啲人食極都係得棚骨，又會唔會係一種病呢？哎！我求大俠遲啲放大假都要請教吓醫生先得。