甘乃威同何秀蘭一方面為咗馬力遺缺爭崩頭，另一方面原來兩個都無意再選區議會，讓番兩個位出嚟。據知民主黨要求擬參選黨員表態，甘乃威卻一直冇反應。
甘從政近廿年，做過市政局、區會雙料議員，03年區選民主派受惠7.1效應報捷，佢拉攏委任議員當選中西區議會主席，後來俾人批評民主黨反對委任制，卻同委任議員做政治交易而辭職，自此意興闌珊，據知佢傾向唔再選區議會，留力出年盡地一煲。
有民主黨人話，甘政途多舛反映香港政黨政治困局，若不解決，從政只係消耗青春的活動。甘、何噚日雙雙出席港台節目，兩人表現和氣，要睇針鋒相對場面，相信要等到民主派預選先有好戲睇。