踏入8月，又係一年一度上市公司公佈業績嘅高峯期，每年呢個時候，唔理inhouse或者agency嘅公關，好多都會同傳媒check吓時間表，確保唔同人撞日，但今年就爭啲出現多家大型公司同日派成績表，呢個咁高興嘅日子，之唔係通勝裏面連一般吉日都唔係嘅23號，即係嚟緊個禮拜四囉！最唔通氣嘅行業，相信非中資銀行莫屬！
李超人嘅長和系（交易所編號1搭13），一般揀喺星期四，行內好多人都知；華華聽聞，原本中信銀行（998）同中信國際金融（183）兩姐妹，都揀咗呢日，但可能為免同超人正面爭鋒，中信銀行已提早一日，得番中信國金可能改唔到；但唔係間間中資銀行咁識做，中國銀行（3988）同中銀香港（2388）兩母子，以及工商銀行（1398），原來都係揀咗呢日。
另外，油公司巨無霸中石油（857）同航運股中遠太平洋（1199）都湊熱鬧，同日公佈業績。
記者忌sickleave
Richard檔8號仔儘管好通氣咁，避開唔同阿爸撞，但電訊業都唔執輸，有個代表撞落去──祖國電訊藍籌股聯通（762）！
睇睇通勝，23號宜祭祀、栽種、結網、納畜，忌出財、開倉、收倉，亦冇乜好時辰，點解咁多人揀呢日？
據聞上述中資銀行冇諗過撞期，定咗董事會日期，其中又以中信系最進取，雖然中信銀行提早咗一日公佈業績，但記者會依然喺星期四，點都要同日「爭光」。
計華華話，當日其實係所有財經記者都忌sickleave囉！