楊思琦變變變小忌廉
「我細個嗰陣時，好鍾意睇《我係小忌廉》（小圖），所以最鍾意小忌廉，未變身前佢個樣好得意，變咗身後，佢唱歌又叻，變變變，變咗啲衫都靚咗好多㖭！不過我冇諗過學佢，冇諗過要變得好似佢咁靚，但就有買過支玩具變身棒，用嚟玩變身，好可惜已經冇保存，搬屋時丟咗。」
朱茵愛櫻木有儍勁
「我好鍾意《SlamDunk》（男兒當入樽）入面嘅櫻木花道（小圖），我覺得佢個人好專一，因為佢好鍾意晴子，於是為咗對方加入籃球隊，之後入到籃球隊又好有拼勁，人又好勤力。其實我好鍾意佢份人好有儍勁，真係好可愛，我認為現實中一定會有呢啲人。」
古巨基信念學戴志偉
「我好鍾意《足球小將》嘅戴志偉（小圖），因為佢對足球嗰份不屈不撓堅持到底嘅精神，令我極之佩服佢，同埋覺得好值得學習。其實我話好鍾意唱歌呢份信念，係源於戴志偉話好鍾意足球呢個信念。我細個集集都追住睇，仲有落場踢波，個個射波都會話衝力射球、猛虎射球同剃刀射球。」
關智斌偷偷錄聖鬥士
「細個時候所有男仔都會睇《聖鬥士星矢》（小圖），可以話有份情意結，因為佢播嘅時間好夜，卡通又暴力，屋企人唔會畀我睇，所以成日偷偷錄低，然後再返學校同同學交換睇，呢個經歷令我好深刻。以前唔會有錢買星矢玩具，最多得主角同自己個星座公仔，不過𠵱家有經濟能力，已經買番晒。」
採訪、攝影：李珮洳、王連連、馬建華
