關仁隱事:芥蘭得罪三色台 - 關仁

關仁隱事:芥蘭得罪三色台 - 關仁

女歌手「芥蘭」呢排都算當黑,負面新聞一單接一單,搞到佢好唔開心,但又想扮大方面對,等人覺得佢仲企得好穩。是非緋聞纏身,當然會俾記者追住問,前幾日芥蘭去咗三色台唱歌,一早去到等總綵排,點知俾大班周刊記者包圍,佢就一臉鎮定,諗住有問必答扮冇嘢,點知越問越耐,輪到佢埋位時,佢身邊嘅工作人員,喺呢個時候又唔敢得罪記者,所以唔敢叫佢,芥蘭就咁錯過咗總綵排,雖然冇得失記者,但公仔箱就好震怒,嬲芥蘭情願應酬記者,都唔照通告埋位綵排,話佢咁樣等於失場,呢單嘢佢公司都要慢慢謝罪先得喇。
Textby關仁