看着澳門賭業興旺，帶來市面一片昇平，雖不知澳門市民是否真的受惠，但表面的浮華已夠叫部份港人眼紅，大聲疾呼，為何香港不能搞賭？與其讓港人及大陸客抬錢到澳門賭，不如在香港興建賭場（或主題式公園賭場），一定搞得比廸士尼及海洋公園更有聲有色，連新加坡這樣一個家長式管治的地方也有得賭，香港怎麼沒有得賭？
香港怎會沒得賭！一早已有，賭得只有更大，中央早有分數，分豬肉，派餅仔，澳門賭大細、廿一點、百家樂，香港賭恒指、期指、孖展，兩兄弟一人睇一瓣，大佬金融體制夠成熟就睇住金融檔口，細佬地下秩序夠整齊則睇住檔廳。試看看新聞報道中金睛火眼望實電腦睇股票的所謂散戶投資者，投甚麼資？根本就在賭，每次受訪時答案大同小異，反正只得一堆冧巴，對公司實質業務Idon'tcare，大市升則興高采烈覺得自己有眼光，大市瀉則焦頭爛額眼濕濕欲哭無淚。
大細、廿一點、百家樂輸贏還看睇個天，恒指、期指、孖展則完全睇揸莊嗰個話事，呢頭話OK有信心，嗰頭就轉口風趁地腍打落水狗，揸住張路紙估下一鋪開大定細已夠求其，買股票聽貼士就更無題，唯一能夠與之抗衡的不二法門就係唔好貪，但坐得埋賭枱又有邊個會唔貪。
發財埋便，大細、廿一點、百家樂過澳門，恒指、期指、孖展喺香港，揸住籌碼賭唔覺係錢，啲錢只是一堆銀碼在電腦內碌嚟碌去則更唔覺係錢，及至埋單結算時才知已入肉。祝君平安。