上星期全球股市大跌，好彩香港恒指國指一早升到笑，喺三月入市嘅，仍然唔使輸，如果你喺七月中先至入市高追，當然輸到喊。
不過如果係喺八月六日星期一睇完《蘋果》B13版嘅麥嘉華筆記，產生戒懼之心嘅話，或可避過一劫。麥嘉華二十年前估中八七年有股災，成為名家，有「末日博士」之稱，好多人以為佢永遠唱淡，其實不然，佢曾經唱好新興市場股市，讀者夠膽跟嘅話，有錢賺。
八月六日麥嘉華講興登堡凶兆（HindenburgOmen），左丁山立即上網查清楚。麥嘉華話截至七月二十三日，興登堡凶兆在六個星期內出現八次，快啲沽貨，佢自己會把握每一次反彈機會沽貨，美國信貸市場問題會影響全球，令新興市場變得最脆弱。你話嘞，十個交易日之後，末日博士係唔係料事如神？
一位RobertMcHugh博士係興登堡凶兆專家，佢篇六月廿三號文章（www.safehaven.com）講明，喺六月十三日、六月二十一日、六月二十二日，興登堡凶兆明顯出現，而過去二十二年來，每一次股災或恐慌性拋售之前，凶兆一定會行先；反過嚟講，如果凶兆未見，股市即使一路上升，市場仍然安全。一旦見到凶兆連續出現兩至三次，大家就要小心嘞，出現後一日至一百二十日之內，股市會插水，在四十一日之內大跌嘅機會係百分之五十。
現在事後孔明，計番轉頭，六月二十二日之後嘅第四十一個交易日應該係八月二十日，但未到第四十一日之前，股市已經大插水，跡近股災階段，唔怪得麥嘉華呢位淡市老雀喺八月六日專欄就發出警告。
興登堡凶兆係以杜瓊斯指數為基礎嘅，可唔可以應用於恒指，左丁山唔識。要確認一個凶兆，須要滿足五個條件，並不容易，故此凶兆唔會經常出現，而且出現一次唔算數，必須連續出現兩至三次。大家如果投資輸錢，都要學番一啲嘢至啱。