第64屆威尼斯影展早排公佈咗入圍名單，李安嘅《色，戒》、姜文嘅《太陽照常升起》同李康生嘅《幫幫我，愛神》呢三部華語片都入咗競賽部份，香港導演冇片入圍，但噚日影展方面有新改動，決定將杜琪峯同韋家輝執導嘅電影《神探》補選入競賽部份，下月6日仲會喺當地舉行首映禮。
戲劇性有前科
屆時阿杜會同劉青雲一齊去威尼斯參加影展，佢噚日收到大會呢個通知，當然係好開心。聽聞今次佢能夠入選，完全係因為大會主席之前睇過呢部戲嘅預告片，覺得部戲唔錯，想請呢部戲參展，但當時仲未拍好，到部戲完成咗，大會再要求攞部戲嚟睇吓，研究可唔可以擺喺觀摩部份，點知班評審睇完，覺得部戲拍得咁好，應該撥入參賽部份，所以就畀呢部戲後補入選。
呢個咁「戲劇性」嘅決定，上年都發生過，內地導演賈樟柯執導嘅《三峽好人》，就以後補身份喺最後一刻入圍威尼斯影展嘅競賽項目，最後仲畀佢贏埋最高榮譽嘅金獅獎。
