大受全球歡迎嘅《變形金剛》（Transformers）令男主角沙拉保夫（ShiaLaBeouf）人氣急升，電影公司唔食住個勢搵番佢嘅電影急急上映就儍啦！雖然呢套《窺兇殺人》（Disturbia）今年4月已經喺美國上映咗，但呢套被喻為「少年版後窗」嘅驚慄片，當時打低咗《蜘蛛俠3》（Spider-Man3），一啲都唔嘢少㗎！ 撰文：戶川淳
沙拉保夫已經唔再係荷李活二打六年輕新星，身為大導演史提芬史匹堡（StevenSpielberg）新愛將嘅佢，喺8月30日本地上映嘅《窺兇殺人》入面已嶄露鋒芒。
新血腥版《後窗》
套片唔止係緊張大師希治閣（AlfredHitchcock）嘅經典電影《後窗》（RearWindow）嘅少年Update版，仲混合《奪命狂呼》（Scream）同《死神來了》（FinalDestination）嘅恐怖血腥，最重要係觀眾可以睇到沙拉點樣一支公孭晒飛，套片喺美國上映時口碑不俗，連續三星期成為票房冠軍，英國亦唔執輸，安排套片下個月上映，沙拉保夫呢鋪掂硬！
喺片中扮演17歲少年家樂嘅沙拉保夫，因犯事被判「軟禁在家」90日，足踝被繫上一部接駁到警署嘅電子監察器，唔可以走出家居範圍，令人想起獄海太子女ParisHilton早排扣上腳鐐喺寓所軟禁嘅情景。
盡用現代科技
唔同嘅係家樂悶極無聊拎起個望遠鏡喺窗前四圍昅，起初只係偷窺剛搬嚟嘅索女鄰居，點知某個深夜竟意外目擊血濺窗戶，尖刀狂插嘅驚心情景！苦無證據又唔可以離開屋企嘅佢，惟有捧住部DV機冒險追蹤兇手一舉一動，又利用手機傳短訊、拍短片放上網、MSN等各種途徑，遙控朋友出外協助緝兇！
《窺》片仲有兩位為人熟識嘅實力派演員助陣，飾演男主角母親嘅嘉莉安摩絲（Carrie-AnneMoss），正係喺《22世紀殺人網絡》系列（TheMatrix）中嘅型女Trinity。至於飾演嫌疑兇手嘅就係同梁家輝一齊演過電影《雙瞳》嘅著名性格演員大衞摩斯（DavidMorse），佢6呎4吋高大身形加上陰晴不定嘅神情，令人不寒而慄。屬「方法演技派」嘅大衞摩斯，為投入角色，喺片場中一直保持疏離，唔同其他演員傾談或一齊食飯，呢啲真係入型入格。
人物誌：被譽湯漢斯接班人
今年21歲嘅沙拉保夫唔係突然間爆出嚟嘅，佢10歲時已決心做藝人，為咗搵演出機會，試過喺電話中扮大人聲，訛稱自己係來自英國嘅藝人經理人，雖然最後俾人拆穿，但佢扮嘢本領卻贏得注意，成功爭取演出《X檔案》（XFiles）、《仁心仁術》（ER）等機會，佢又憑主演廸士尼電視劇《EvenStevens》贏得艾美獎，唔少美國觀眾都睇住佢大。
沙拉保夫近年參演過電影《魔間行者》（Constantine）、《智能叛變》（I,Robot）等，仲獲史匹堡睇中，除主演《變形金剛》外，更欽點佢演《奪寶奇兵》第4集，演夏里遜福（HarrisonFord）個仔。佢仲被睇好為湯漢斯（TomHanks）接班人，星途無限！