恒生嘅副董事長兼行政總裁柯清輝為人性格豪爽，酒量亦佳，人稱佢做「柯大俠」不無道理，原來呢位大俠年輕時鍾意睇金庸武俠小說，耳濡目染下，深諳「談笑用兵」之道。
有一次，柯生向高層人員講解07年中期業績，喺主講台上行落嚟之際，見到負責私人銀行嘅朱婉儀、負責財富管理業務嘅梁永祥，於是將佢哋拉埋一邊傾偈，柯大俠讚佢哋喺3年時間裏面（柯生加入恒生3年），就可以將私人銀行盈利翻一番，比較原訂嘅5年時間短，認真幫得手。
讚完催交成績
正當俾人讚到面都紅嘅時候，柯大俠問：「咁下一次翻一番會係幾時呢？」
梁永祥回憶話，就係喺一個咁短嘅對話當中，柯生就使出咗佢嘅「談笑用兵」之計，就係取3年同5年嘅中間、即係下一個目標係用4年時間，將私人銀行業務嘅溢利再增加1倍。