年底區議會選舉民選議席競爭激烈，唔使選等煲呔分餅仔嘅委任議席更加緊張，據聞各政黨頭頭短期內就會提交推薦名單畀政府，等煲呔揀蟀。有人同八方報料，話名單上包括麗的時代女藝人方國珊。後生仔可能唔識佢，方國珊80年代幾出名，拍過《哪吒》、《龍的小子》等劇集，後來淡出幕前轉戰商界，近年主攻西貢地產生意，係坑口將軍澳商會主席。
方國珊係自由黨員，由於捨得贊助地區活動，所以頗得田少器重，又同民政處關係好，因此獲自由黨推薦，最終能否上位由煲呔定奪。鄉紳話畀八方知，方國珊同第一代「新界王」張人龍好熟，成日傍住龍叔太太出入，人稱「龍叔契女」。