次按風暴同信貸危機對花旗經濟帶嚟好大威脅，聯儲局上禮拜五終於出手，大幅減貼現率0.5巴仙，歐洲同花旗股市都即刻大幅反彈。
之前好多人希望聯儲局減息，諗嘅都係美國銀行同業拆息，而唔係貼現窗利率，𠵱家咁樣係咪即係同減銀行同業拆息一樣？簡單嚟講並唔係一樣，如果係就唔使分開兩個唔同嘅利率。咁𠵱家入市嘅態度應該係點？
股市跌咗咁多，會有反彈機會，港股今日高開冇乜問題，但好多人都想知個市係咪見咗底，如果只係反彈，阻力又喺邊度。次按同信貸危機咁大鑊，應該冇咁快搞掂，港股反彈嘅阻力會喺100日線（21303），花旗嗰邊暫時會偏好，但係再有壞消息出現或者花旗股市出現顯著下跌，你話港股會點？呢樣就係𠵱家入市嘅風險，策略仲係小注短炒。
港交所C輪7556：港交所（388）上禮拜五報收106.30元，最低報96.80元，已跌至之前推介嘅港交所P輪3418嘅目標價，可以掉頭炒反彈，買港交所C輪7556，博正股上番118元，7556現價27仙，有效槓桿率3.2倍，正股升上118元，7556應該37仙樓上，正股跌穿102元止蝕。