上個禮拜五，恒指大DeepV，唔少股民焦頭爛額，網友鍾方安心從中得出一個結論，就係「信老婆會發達」。佢話：「過去多年嘅投資都係由自己話晒事，上個月，老婆三番四次叫我將賺咗嘅股票放咁啲先，因為覺得恒指一年升超過7000點，錢冇乜理由咁容易賺。不過，我冇聽佢講，𠵱家手上有啲貨要坐艇。」
Kpjune好同意：「兩個禮拜前，我聽老婆話，放晒啲股票，𠵱家瞓得好安樂，有時女人嘅直覺好掂。不過我問佢幾時入市，佢就冇答我。」
Kanamejpy就聽個女話：「個女乜股票都唔識，不過幾個禮拜前同我講，叫我沽緊啲股票，咁我咪放咗一半貨，所以家陣冇乜點輸。」
穩陣派 唔亂博
Plover認為：「女人嘅第六靈感有時真係準到你唔信。」riko337話：「其實係因為大多數女人都比較小心，唔會好似男人咁心『雄』，乜都唔理走去博，特別係嗰啲冇炒開股票嘅女人。」
身為女人嘅husky168就話：「7月尾，我叫老公放晒啲股票，袋袋平安先，好彩佢肯聽我講，結果今次跌市冇損手。男人有時真係要信吓老婆嘅直覺，因為我哋比較穩陣，加上女人嘅第六靈感有時真係好準㗎。」
http://www18.discuss.com.hk/viewthread.php?tid=5040063&extra=page%3D14&page=1