前嗰排，喺《蘋果》理財版寫新書推介嘅浸大麥萃才（Billy），收到封服刑中嘅讀者來信，問佢有關專欄提及過嘅某一本書。Billy覺得呢個讀者好特別，雖然坐緊監，但冇放棄自己，非常好學，相信犯事只係年少無知，所以佢將嗰封讀者來信電郵畀華華，間接介紹咗個筆友畀華華。
華華寫電郵就多啫，但拎起支筆寫信就好耐冇試過，為咗表示誠意，華華親手寫咗封信畀呢個獄中朋友，原來誠意真係可以打動人，華華收到佢回信，Billy冇估錯，佢因為細個行錯路，所以要喺獄中過幾年。佢知華華係「中環人」，講咗好多監獄裏面見到嘅金融圈人軼事畀華華知。
鋤大弟8000銀一隻
佢話，之前見到一個𠵱家已經出咗獄，前排仲同港姐一齊遊日本嘅二世祖，畀佢好深刻印象，事關佢入冊冇耐，就已經適應晒入面嘅生活，粗口流利到不得了，仲時不時會同囚友打下拳頭交，又曾經因為牽涉毒品，要隔離觀察，單憑言行舉止，真係冇人估到佢曾經係上市公司主席！
獄中名人又點止得咁少，除咗二世祖，仲有一位當年想買「衣車」，後尾衰造假賬而入獄嘅前上市公司主席，佢近排成功申請上訴，筆友話，佢喺監裏面好少同人傾偈，但間唔中會話當年，有次佢又想當年，話風光時曾經同啲大官一齊夾錢，開高級私人俱樂部，玩鋤大弟8000銀一隻。其他同監「獄友」聽到，都唔知幾鬼羨慕。
[email protected]