港股玩放血，股仔血流成河，但插到現水位，好多股仔已經抵買。重點目標係CashRich類別，中華網（8006）係其一。中華網現金7.5億銀，連可供出售投資淨額講緊13億銀，等如每股淨額近0.3元，係中華網現價（0.39元）76.9%！
中華網玩法保守，上市以來，一路都唔派息，揸住嘅現金連投資淨額，係公眾街貨市值3.97億銀嘅2.8倍。控制唔到個腦，好難唔去估，中華網有私有化條件同機會。當然，中華網銀彈多，亦代表有條件去搞收購及投資，包括集團已經多次提及投資祖國私募基金之機會。要咁睇，呢壇製作，目標係祖國而唔係花旗項目，避險之餘，仍然有玩ChinaPlay條件，收購落實，一樣有得炒。中華網呢期插水，已經跌到近兩年低位，可以酌量收集，再跌就喺0.25元再撈，然後擺埋一邊，博上邊兩個可能其中一瓣彈出，隨時係一兩番回報。
錦興博折讓收窄
呢轉牛市，除咗保華（498），德祥系包括二線頭艦錦興（275），相對科網潮時表現，硬係差咁啲。但錦興經呢轉調整，現價（0.34元）已經挨近公司回購價，開始有支持。再講，錦興呢期開始涉足資源項目，但現價NAV折讓仍然高達56%。資源sector前排炒到癲，經呢期回落，好多P/B仲係高企1倍樓上。呢轉短打，博錦興NAV折讓，係咁易收窄到45%，錦興要見0.42元。