香港青年工業家協會8月頭帶隊去越南考察，睇吓嗰邊有冇景，會長蘇永強返到嚟香港同華華講，唔使睇乜，淨係睇胡志明市嘅廁所就知嗰邊投資環境唔錯。何出此言？正所謂見微知著，佢讚當地廁所夠亁淨，就知當地人有質素。會長即係會長，咁都畀佢諗到。
佢仲話，家陣歐美國家有心將越南栽培成工業生產基地，用嚟抗衡中國全球工廠嘅地位，喺越南開廠，至少唔使驚中美無日無之嘅貿易磨擦，同乜乜反傾銷稅制裁。
每次檢定做紀錄
講開美國美泰要回收成2.4億銀嘅中國製玩具，香港中小型企業聯會會長佘繼標就話，對本港廠商好唔公平，因為嗰啲玩具交畀美國客之前，喺製造過程中，已經過買方檢測過貨辦、測試、公證行檢定、買手代表品質檢定等關口，前後十幾廿次，個個月派人檢查。佢建議本港廠家喺買方多次品質檢定過程中簽訂確認書，白紙黑字將過關嘅品質檢定紀錄。
香港青年工業家協會常務副會長郭燦耀就呼籲，來料加工廠商盡快喺8月23號前，同買家重新簽訂合同，以趕及換取1年寬免限期，唔使咁快用現金交保證金，不過長遠嚟講，企業都要考慮將產業升級。