國際大鱷索羅斯舊拍檔、商品大王羅杰斯（JimRogers）早排話：「隨住中國經濟持續高速增長，當地資本市場同金融市場會受惠，廿一世紀係中國嘅時代。」佢大膽預測，中國牛市可以維持80至90年，仲特別睇好水利、環保、太陽能、風力發電等行業未來20年嘅前景。
Hitman喺《香港討論區》話：「中國股市近年升到嘭嘭聲，莫講話牛多80年，就算牛多10年，我都心滿意足！」shevchento就比較短視：「我淨係關注未來5年股市走勢，80年？成個地球可能已經冇咗喇！」
引人落叠 自己出貨
kitkitkit67講：「80年，真係廢話，到時我已經去咗賣鹹鴨蛋！」fag睇唔過眼鬧：「羅杰斯大力吹捧中國股市，其實係想討好中國政府，所以猛咁拍馬屁，佢呢個洋鬼子真唔知醜！」yylam713就發表陰謀論：「羅杰斯一味唱好中國股市，可能係想引啲散戶落叠，自己乘機出貨。」
羅杰斯話：「我喺1999年開始買中國股票，至今未試過沽貨，只有繼續增持，因為我睇好中國會成為下一個強國；就算中國股市跌五成，我亦會揸住唔放。」不過，羅杰斯都驚中國股市真係會有「泡沫」形成，「中國股市已經升咗兩年，真係飲得杯落，但升咗咁耐亦似乎唔係幾正常。我唔希望中國股市翻3倍，如果真係咁，我惟有出貨。」