迷倒萬千少女嘅尊尼二人組合瀧與翼，前日主持通宵慈善節目《24小時愛心救地球》，兩位靚仔成員瀧澤秀明同今井翼自然落力演出，阿Net噚日已見到有網友將節目片段放上YouTube，其中阿翼同瀧仔齊齊跌落水池變落湯雞嘅片段，竟然引嚟網民爆粗。
被指白癡
話說前晚喺日本NTV電視台直播嘅《24小時愛心救地球》，有個環節係要嘉賓跳入裝滿熱水嘅透明水缸度，不過當幾位只着三角褲嘅核突麻甩諧星若無奇事咁浸過水後，引嚟圍觀藝人懷疑缸水根本唔熱。身為司儀嘅瀧與翼即刻走上水缸測水，唔知係咪博收視，阿翼一手將拍檔瀧仔推落水，阿翼就跟住碌埋落去。極好身手嘅瀧仔喺千鈞一髮之際，由個缸度彈出去再碌地，十足特技人一樣，佢同阿翼嘅落湯雞樣，令在場嘅女藝人又驚又笑。
不過呢段片好似唔係個個受落，有網民即時喺YouTube留咗「很白癡」三個字，之後仲有網民繼續寫英文粗口，阿Net真係冇眼睇。
瀧與翼變落湯雞
網址： http://www.youtube.com/watch?v=wqrD9T5vnBQ
版主：阿Net
本欄逢周一至五刊出