從政嘅，識掌握身體語言好重要。好似職工盟秘書長李卓人咁，當扎鐵工潮已經持續咗十幾日，佢就喺噚日發動嘅大遊行上，上演一幕即場除衫，振臂高呼：「赤膊上陣，同工人同一陣線！」如果呢一幕移師到紅館演出，話唔定會hit過學友巡迴演唱會。
以為係抗議豬肉加價
雖然都有唔少人笑阿人肚腩大過胸，以為佢喺度抗議近日豬肉加價，但八方現場所見，啲扎鐵工人真係幾受落。曾幾何時，阿人都算係一個「師奶殺手」。話說當年佢搞絕食抗議，就有已婚OL話想煲湯畀阿人飲。不過，呢幾年阿人嘅身形越嚟越發福，唔講仲以為佢轉咗去做飲食界議員。所以，噚日當佢一脫之後，現場除咗有掌聲同歡呼聲，仲有些少笑聲，搞到阿人有啲唔好意思，企喺塊banner後面遮住個肚腩。
據阿人嘅太座娥姐講，老公除衫之舉係即興嘅，之前亦冇同佢商量過。嗰陣其實已經去到集會嘅尾聲，阿人突然向台下嘅工人講：「有份禮物送畀大家。」跟手就好似阿Rain開個唱時咁，將件軍綠色嘅T裇除咗落嚟，但露出嘅當然唔係六嚿腹肌，而係白雪雪嘅豬腩肉。
阿人話，件衫係美國礦鐵工會送畀佢嘅，寫住SCABHUNTER，意即「工賊獵人」，呼籲啲人唔好做工賊（破壞罷工者），除衫就代表佢赤膊上陣，同工人一齊堅持落去。喺隔籬嘅長毛見狀亦有樣學樣，即脫！雖然兩人嘅身形，同台下個個手瓜起𦟌嘅肌肉鐵漢冇得比，但佢哋依然叫好。後來，阿人仲將件衫綁喺工人帶嚟嘅鐵枝度。
集會結束，阿人落嚟接受記者訪問，有職員叫佢着番件衫，佢懶型咁話「唔使」，赤條條咁俾記者扑咪，仲同記者話唔好意思，成身臭汗攻親大家。佢又話，因為喺台上見到台下有啲工人冇着上衣，先觸發佢除衫之舉。
搞工運必須同一陣線
有啲行家笑阿人又肥又白，成隻「白皮豬」咁，但八方就話，雖然佢同啲工人喺身形同膚色方面有啲距離，但今次除衫實在除得好，因為搞群眾運動，最緊要就係唔好脫離群眾。唔好學似工聯會咁，本來係最先代表班扎鐵工人出頭，到𠵱家居然冇晒影。呢一點，左派冇理由唔明。