數碼達人：假鈔見光死<br>手機也識照銀紙

數碼達人：假鈔見光死
手機也識照銀紙

人人玩大富翁都有個夢想，買地、起樓、再收購！最過癮莫過於做Banker嗰位，拎住叠銀紙逐張逐張咁數，直頭財爺上身咁款！但到你大個仔，數銀紙就唔可以太求其，尤其返大陸消費仲隨時接觸到假幣㖭！唔想俾人呃，就要學識點樣分辨真假銀紙。最近國產Tianyu推出一款具驗鈔分唇嘅手機A905，只需一機傍身，就算去到「高危區」東門掃貨，都唔使驚收假鈔啦！

記者：陳國輝
攝影：楊錦文
Model：Anson@PureModel

現場測試：太光猛照唔出！

喺士多或7仔都見唔少，當你畀張大牛（$500）或金牛（$1,000）找數嗰陣，店員循例會用一部紫外燈驗鈔機Check吓張銀紙有冇水印，係真定係假？A905的所謂驗鈔分唇，原理差唔多，佢只係利用鏡頭隔籬嗰盞補光燈扮成驗銀紙工具咁解。
啓動該功能後，補光燈會散射出一道紫色光，小記嘗試喺室外環境作測試，由於光線太過微弱，結果乜都睇唔到！跟住再走番入室內測試，終於見到一道淡淡嘅紫色光，但仍然微弱，最後惟有將手機貼近張紙幣，逐吋逐吋咁檢查，認真辛苦到爆！

■驗鈔燈功能並冇Short-cut掣，要入Menu揀。

■究竟係紫色燈抑或紫外線，只有佢自己先知。

現場結果：真係驗到！

小記用$500及$100紙幣測試驗鈔功能嘅準確性，最後成功驗出銀碼水印！但過程極為辛苦，要走入黑麻麻嘅環境先Check到；如果喺街邊買樣嘢然後作試測，可能乜都見唔到。

320萬像玩拼相

國產機谷上320萬像素一啲都唔奇，A905贏在影完相後，仲可以慢慢畀你舞！例如當你幫屋企人個別影好幅相後，可利用手機嘅「圖片拼布」，將幾張相拼合成為一張。呢項功能提供兩張、四張或九張畀你揀，雖易於操作，不過玩法較為單一，唔似得有部份韓國手機，已加入全景或馬賽克模式咁多花臣，但簡單有簡單嘅好，畀細路仔玩已經足夠，亦唔使太過花巧。

■有搖骰仔遊戲，俾你過手癮。

■「圖片拼布」可將相片結合為一張。

FM錄音隨時翻叮

撇除驗鈔呢項騎呢功能，A905本身亦係一部Multi-media手機。喇叭位於機身背脊，播歌時估唔到大聲得嚟都唔算坼，仲難得有3D音效，例如浴室、教堂，甚至連歌劇廳等環境效果亦可以模仿出嚟。不過，齋靠手機播歌唔覺有乜分別，用隨機附送嘅立體聲Handsfree欣賞，或自購A2DP藍芽立體聲耳筒，效果當堂正好多。更值得提係，播歌之餘仲內置可預錄嘅FM收音機；如果平時早瞓，冇時間聽深宵節目，不妨先進行FM預校錄音，校好時間，留番第二朝或日後翻叮。可惜係跟機得128MB記憶卡，夠唔夠用仲未知。