港股經過大洗禮後，股仔中十有八九都已經歷過插水式下跌，亦戲劇性彈升，呢類股仔，應可確認到底。
上周五，恒指大跌千多點時，好多股仔跌到面目全非，慘不忍睹，最低時個價，同今年高價相比，直情係一個天、一個地，仲有好多連大升前嘅起步位都守唔住，正係辛苦耕耘大半年，霎時間灰飛煙滅。
大市未跌之前，唔少股仔已到頂番轉頭，跌定先。現時大市前景雖然未明朗，但好多股仔已出現終極一跌，到咗底，又可以從頭來過，東山再起。
總之，插過水嘅股仔已見底，出現DeepV式反彈嘅，屬於強勢一族，唔少更由低位回升超過4成，反彈個勢咁勁，必然有因，逢低可吸。
‧高寶（274）、新威（058）已提過，都係逆市而升，高寶由低位反彈56%，新威反彈40%。
‧新創（1141）最低0.55元，收0.82元，低位反彈49.1%。
‧華潤勵致（1193）由0.72元彈上1.06元，升幅47.2%。
‧莊士機構（367）由0.99元上番1.42元，大升43.4%。
‧佳邦環球（471）由0.33元谷上0.47元，升42.4%。
‧國訊國際（8128）由0.145元掃上0.204元，升40.6%。
康健彈得小可博
除急彈股外，由低位回升得唔多嘅，相信好快亦會輪到，亦係短炒嘅大好對象，特別係已大跌嘅，反彈必急。
‧金龍集團（329），今年高位1.97元，上周五低位0.56元，大跌71.5%，收0.71元，短線可望重上1元水平。
‧福邦控股（1041），高位27仙，上周五低位9.5仙，大跌64.8%，收11.7仙，短線可上番15仙。
‧宏安集團（1222），高位1.1元，低位0.188元，大跌82.9%，收0.217元，短線有機會見番4字頭。
‧康健國際（8138），高位0.337元，低位0.111元，跌幅67%，收0.134元，反彈目標0.18元。