七月三十日本欄講「搵工講技術」，之後有讀者來電郵，問左丁山有乜見工須知可以教吓佢。老實講，左丁山成日都係口噏噏，當秘笈嘅啫，認真研究起嚟，其實冇乜專長。不過碰啱小B自芝加哥畢業回來放假，佢在學校與同學交流見工經驗好多次，幾位同學入咗高盛、大摩呢類投資銀行，已在華爾街工作至廢寢忘餐，小B就話要玩夠先至去紐約搵工，但唔想做華爾街咁辛苦。既然放假有空，左丁山叫佢代寫一篇見工備忘錄，畀左丁山啲年青讀者參考吓。小B玩咗成個禮拜先至記得寫，𠵱家寫好咗嘞，對申請銀行、投行、金融機構工作嘅學生，或者有啲用，如果讀者需要嘅話，請寄上電郵地址，等左丁山畀你哋。
見工之前有準備當然係好，但答得太流利有時竟然會誤事，總之點都要人夾人緣，以in你嗰位仁兄仁姐鍾意你個款就有優先。左丁山年青時見工，試過幾次符碌，事隔多年，諗番起都好笑。畢業後，大學就業輔導處叫左丁山去渣甸見工，第一次見面，講咗半個鐘頭以上，過程十分暢順。最後嗰位陳先生（到𠵱家仲記得佢姓陳）問：「平時你有冇睇時事雜誌？可否舉例說明之？」左丁山立即依起棚牙答：「有呀，FEER、Time、Newsweek、Fortune、Businessweek，每個禮拜都睇，仲有明報月刊。」陳先生問：「睇邊啲新聞或內容呢？」左丁山答：「由頭揭到尾，頁頁都睇。」
見完拜拜，之後無咗音訊，即係肥佬冇行啦。就業輔導處主任唔抵得，打電話去問陳先生：「我哋位學生見成點呀，佢見工有乜缺點呢，請話畀我聽，等我用嚟輔導其他學生。」主任跟住召左丁山去訓話：「渣甸話唔請你做trainee咯，陳先生話你睇雜誌睇得太雜，漫無目的，顯示唔到你要走嘅路向。」
冇得做渣甸，去另一個大公司見工，一位睇起嚟比左丁山還要年輕嘅女士負責interview，過程順利。點解咁年輕就有資格負責請人呢，左丁山衰在每事問，臨走前問呢位小姐貴姓，邊一年大學畢業。小姐話：「我今年畢業，我姓K。」後來查番資料，呢間公司嘅大老闆就係姓K嘅，份工有冇行呢？當然冇啦。就業輔導處打電話去問，據講K小姐唔見咗個快勞喎。