食知味：陳嘉容×陳貝兒<br>美麗膠流

食知味：陳嘉容×陳貝兒
美麗膠流

陳嘉容（Eunis）和陳貝兒（Janis），一個是名模，一個是主播，早前齊齊躋身才女行列，前者的《星級靚湯》，有大班明星好友撐場，夠睇頭；後者的《娛是我聞》，則有中外群星拱照，夠噱頭……咪住先，今日唔係sell書，一心請兩位靚女講吓飲食美容心得，嘆一餐美麗飯局，點知二人一坐埋，Janis竟然話好怕同Eunis影相，莫非二人最近爭賣書銷量搞到面左左？

記者：趙珮倩　攝影：梁細權
陳嘉容服裝提供：MEREDITH

E=EunisJ=Janis

Eunis早餐大陣仗

J：「你係咪好細個就鍾意煮嘢食？」
E：「我係為食，以前見報紙副刊教人煮餸就會剪低跟住做。」
J：「你咁忙仲邊有時間煮飯？你去街市買餸會唔會唔方便？」
E：「我鍾意去街市，因為多嘢揀，價錢又平，有時檔口老闆仲會搭多啲嘢畀我㖭！平日最多時間煮早餐，日日唔同，有時煮糙米加黑米，再加雞蛋、青豆；有時會煮豬骨粥、麥皮；又或者五穀加雜果仁加牛奶……早餐可以食多啲，吸收得最多。」
J：「嘩！好犀利，好勁，我係冇早餐食，因為起身都已經好遲。」

■Janis見Eunis的電話貼滿Swarovski水晶，雙眼發亮：「好閃呀！」話口未完，即刻攞部相機出嚟影低。

■陳嘉容的《星級靚湯》與陳貝兒的《娛是我聞》在某大書局並列而放，據店員透露後者稍為暢銷，曾一度賣斷市。

10杯暖水+早睡=皮膚靚

J：「哈哈！我戒咗同model影合照，因為次次拍埋都影到我成個『大面人』，model啲面真係尖啲……其實我哋之前某啲function都碰過面啦！我見過你行show前未上妝都好靚，成日都想請教吓你啲美容心得。我知道你近排出咗本有關湯水嘅書喎，有乜好湯介紹？」
E：「鮮奶花膠燉雞，因為我好貪靚，花膠含有豐富膠質，可保皮膚濕潤有彈性、鮮奶飽肚、而雞則滋補，三樣都好易被吸收。煲湯最好，簡單又有營養。」

J：「我媽咪鍾意用黃耳加埋淮山一齊煲湯，同樣係有豐富膠質，我都好鍾意飲。你皮膚咁好，又係唔係成日keep住食燕窩㗎？」
E：「我唔食得燕窩，因為之前切咗『朱古力瘤』，中醫話我唔可以食含雌激素嘅食物，好似雪蛤膏同當歸呢類補品我都唔食得，食嘢要好小心；我覺得飲水好緊要，幾熱都好，我都一定要飲暖水，每日最少飲10杯。仲有，我要早瞓，每晚12點前一定要逼自己瞓着，對皮膚會好啲。」
J：「12點我都未收工，通常都係2點幾先有得瞓。但我有食開靈芝，幫助到睡眠質素，尤其出trip，早晚都會食2粒，真係瞓得好啲，皮膚都靚啲。我飲水同你一樣要飲暖水，所以返工一定要帶住2、3個暖水壺。」

美麗飯局
女士免費食燕窩

傾咗咁耐，兩位靚女都叫肚餓……話明係美麗飯局，食的當然要同美顏有關。一向做開京滬菜的仿膳，8月份就推出了抵食的美肌餐，由頭盤食到甜品都sell有美顏之效，當中包括Eunis至愛的花膠菜式，至於其他的瓜瓜菜菜亦堅持全部要有機，所以味道份外清新。不過最筍都係女士們叫個餐，仲免費請你食燕窩甜品……咦！Eunis唔食得燕窩，我咪可以食埋佢嗰份？

■凡女士惠顧美肌晚餐，送燕窩奶凍（$150）。

菊花蟹皇白玉

白玉即花膠，含豐富蛋白質、膠質、磷和鈣，補氣活血，美容護膚，配上豐腴的蟹黃芡，和清幽明目的菊花，一濃一淡，配搭出色。

雙陳小評

E：「自己鍾意整鮮奶花膠燉雞，呢味菜一樣有我最鍾意嘅花膠，keep靚樣靠佢。」
J：「美肌菜點可無花膠，我信晒你㗎Eunis。」

風味四前菜

醬汁牛𦟌：牛𦟌選用澳洲和牛肉，比一般牛含更多單一不飽和脂肪、omega3及omega6，有效預防血管栓塞及動脈硬化。
青邊鮑片：同樣來自澳洲，含高蛋白質、鮑靈素等天然營養成份，低脂、低膽固醇。
開洋脆瓜：青瓜是有機種植，含氨基酸及黏多醣體，具收毛孔、保濕、美白功效。
上海素鵝：腐皮乃黃豆製品，有助降低血內壞膽固醇。