2007年8月，一班瘋狂歌迷齊集九展，為偶像喊破喉嚨，高呼狂叫，這晚，享受這被捧上天的榮耀的，是孫耀威，他開心得哭了。
1998年4月，一班日本歌迷熱切地等待欣賞偶像的音樂會，準備聲嘶力竭地歡呼，惜好夢成空，音樂會因表演者落跑而取消，這位不想接受漫天掌聲的，也是孫耀威，那夜，他醉倒日本街頭，失意得大哭。
想要的，不一樣都是掌聲嗎？當天逃避，之後要歷經多少辛酸試練，思想糾纏，才能換來今天的享受？你說儍不儍？
孫耀威卻從不後悔：「我唔再係扯線公仔，𠵱家聽到嘅掌聲好實在，我知自己唱緊乜，睇到台下觀眾鍾意我啲乜。」 撰文：蔡如玉
那天逃離日本，情況有如拍電影一樣。清晨時分，日本VAP唱片公司幾乎出動全部員工堵塞成田機場所有出入口，氣氛緊張，誓要把孫耀威捉回演唱會舞台。但他早有準備，找了日本朋友幫忙辦妥登機證，然後以九秒九速度成功衝入閘，孫耀威說：「當時心情好忐忑，一過咗關就冇得返轉頭。」
何解不好好站在台上唱歌，接受歌迷熱烈歡呼聲？孫耀威謂皆因他沒時間綵排及背歌詞，擔心上台會出醜，加上開會時被人用粗言辱罵，一怒之下決定劈炮。「我唔甘心只做純偶像，做扯線公仔。無論做得好唔好，啲歌迷都照叫，我等同花瓶。咁不如停低，諗吓以後條路要點行。」因為合約早就完，這樣不顧而去也沒有法律責任，孫耀威只覺得很對不起被蒙在鼓裏的歌迷。
創台劇收視新高
音樂之路就此停頓近七年，孫耀威回歸香港樂壇推出唱片賣過20,000張，人氣升不少，他視之為事業上的第二春。「有一日我帶住副黑超影相，我話自己好似阿邊個，有記者叫我唔好同人比，話佢好out，我好in。我最低潮嗰幾年，可能佢係最in，我係最out，嗰陣可能都有人咁講我，所以唔好睇死任何人。」
99年，孫耀威接拍了《懷玉公主》，創下台灣電視劇收視新紀錄，拍劇生涯隨之展開，「我唔係想放棄唱歌，但就好似不歸路咁，唔知幾時可以返樂壇，好迷失，好唔甘心。」樂觀點想，可以在內地拍劇也算好彩，至少每齣劇都做男主角，錢也賺得多，「嗰陣喺台灣，一年賣一百萬張唱片話咁易，應該發過豬頭炳，但我賺嘅只買到部車。我收嘅版稅特別低，𠵱家多過嗰陣50倍。」拍劇為孫耀威帶來第一層樓，全線在內地發展不代表「撈唔掂」，孫耀威最清楚：「你以為關禮傑唔見咗，其實佢一路喺內地拍劇，可能人哋拍套戲收百幾萬，搵埋不知幾多，你𠵱家覺得我紅，只係你見到我做緊乜，我唔覺得喺內地拍劇叫唔紅。」
撲馬屎磨練鬥志
辛酸當然有，要赤腳在街上走，對有潔癖的孫耀威來說已很惡心，拍《流氓太醫》時，還要硬着頭皮飛撲進一潭馬糞，「惟有叫導演加多啲草落啲馬屎度中和下，由金光閃閃嘅偶像到要撲馬屎，當然好慘，但呢啲經歷訓練到我嘅意志，冇嘢係做唔到嘅。」孫耀威沒有坐着等運到，他不停寫歌，02年台灣Sony唱片為他推出《失去》一碟，全是滿足自己之作，銷量不及商業碟好，「嗰陣反叛期，之前唔畀我做嘅嘢，我一鋪過做晒。」還以為與香港樂壇已無緣，年前伍樂城找他與車婉婉合唱，促成他返港發展。怎知，難聽說話隨之來，「算把啦！」或是「你仲出碟？」孫耀威聽過不少：「有啲人以為我出張碟，為咗去內地登台有新歌唱。我睬你都儍，唔會俾任何嘢打沉。我開足turbo，好有火。就算今次張碟賣得好，下張唔可以差過今次。」
經歷過高低起伏，孫耀威看事情更加心水清，「人哋問我讀咁多書做乜做歌星，我唔覺得揀錯行，只係覺得紅得太早，一出道就去到咁高位，實會向下跌，冇乜幾個做到劉德華咁。𠵱家歌手太hit會好快過時，好容易厭。邊有人唔想紅呀？我唔係講風凉話，呢啲係我親身體驗，我好早紅又跌得快，未必係好事，慢慢起，有基礎會好啲。𠵱家算係我人生另一個高潮，我唔肯定之後成績會更好，但一定會精采。」
未忘舊愛應采兒
不屑做純偶像歌手，得先拋下偶像包袱，不能忌諱展現真我，說到感情事也不可諸多逃避，孫耀威坦承他一直有拍拖，以前在內地拍劇，生活苦悶，最想有女友，收工後有人傾訴心事，可惜當時與圈外女友聚少離多，拍拖四年便分手。拍《懷玉公主》時與女主角鄭家榆墮愛河，孫耀威也公開承認，但愛過痛過之後，他說凡是前女友他都想念，也能做到再見亦是朋友，惟獨鄭家榆不行，「都分咗手，我唔想講人壞話，只係唔想再同佢聯絡。」
孫耀威每段感情都因常異地相隔而結束，連他從沒正面承認相戀過的應采兒也一樣，「嗰陣喺香港拍完《美麗傳說2星願》，我又返咗內地開工嘛。」談到應采兒，孫耀威開始靦覥起來，但仍大讚道：「佢大情大性，係個好爽直嘅人，可以令身邊人好開心，唔好睇佢粗粗魯魯，聲大夾惡，其實對人好真誠。」這次也很hurt嗎？孫耀威說：「每段感情完結一定hurt，我信緣份，有緣先會走埋一齊，有時又會好離奇地無喇喇散咗。」但他謂不抗拒與對方做朋友，只是分手後總要度過心情平復期，才可再聯絡。
招惹狂蜂浪蝶
孫耀威直認每次拍拖都完全盲目，百分百付出，財產也可盡數交付，「我都有反省咁樣係咪戇居，我每次拍拖都希望對方做我老婆，之後就好hurt，分手時仲會極力挽留，唔想放手，唔理自己幾核突，試過求個女仔唔好分開，仲喊埋㖭。」人越大，越容易受傷害，孫耀威現在只想拍散拖，「single真係多咗女fans，去蘭桂坊都多女仔黐埋嚟，撩吓我同攞電話，有啲主動到攬住我。」以後，孫耀威也想找個合眼緣的靚女，拍拖幾年後結婚，因為他要生兒育女。
小志Fans針鋒相對
孫耀威當年於中大修讀計算機工程學，代表學校到台灣參加音樂大賽後晉身娛樂圈，邊讀邊唱被封「學生王子」。離開學校，就會懷念學生生活，日前他返回中大拍照，重遊曾住過的國楙樓宿舍，回憶fans們常往偷看住在一樓的他及幫他抹車，他說：「後來有林志穎fans喺我車後面貼大字報，寫住『小志才是最好的！』我啲fans就用筆喺上面打交叉，再貼我張海報上去，好搞笑。」
下月再入學
物換星移，林志穎早已淡出娛樂圈，各有各忙之時，孫耀威見過他一、兩次，他說：「佢去咗賽車嘛，當年我哋啲fans打交咁滯，但我哋冇嘢，小志幾好人，以前我哋會約埋一齊去打保齡，𠵱家諗起都幾感觸。」
孫耀威打算再進修，下月開學便到港大修讀工商管理碩士，又是邊唱邊讀，都34歲了，現在的孫耀威不叫「學生王子」，他寧願叫「情歌王子」。
攝影：陳慧安
化妝：YenLai
髮型：SunnyYuofHairCulture
造型：CeliaWong
服裝：Brauhaus
