上星期五港股峯迴路轉，低位19386，插穿250日線之後急反彈，守得住重要支持，加上美國減息救市，相信淡友大戶今次嘅「大製作」已暫告一段落，即使再有餘波，都好難再見上周五低位。
跌市過後，長線投資者同大戶落場肯定係先買龍頭股同實力股，至於散戶心態好難捉摸，唔少會博跌到殘嘅細價股，因為大價股一般心理上覺得貴，同時上落幅度無咁大，今日高開5%，未必肯高位追入，反而細價股一日可以上落幾十巴仙，敢追貨都唔奇。
揀股仔炒博反彈，個人認為跌幅大唔大並非首要因素，第一樣考慮要點，係財政狀況是否健全。今年上半年的股仔炒作潮，唔少股票都已成功喺高位集資，如仍未能集資者，相信在隨後一段時間縱有心炒上，都未必有力。假如屬經常集資型股仔，財政又緊絀者，不宜沾手。
反而早排已成功集資，卻被實力不足的接貨者沽至面目全非的股份，有機會出現較大幅度反彈，例如搞柬埔寨林木業的神州醫療（8186），本月較早前配股，近日SDI披露原來接貨者為Keywise及瑞銀等，復牌後近兩個多星期股價由高位跌咗一半以上，現價仲平過Keywise及瑞銀之接貨價（分別0.597及0.53元），博反彈有水位可睇。
分拆股有現金回籠
外資銀行落雨要收遮，理論上現金量高嘅公司最有利，但現金多卻不派息兼唔投資，縱反彈都力度有限，所以另一博反彈之選係即將分拆業務，將有大量現金回籠嘅股票，例如大成生化（809）及高寶綠色（274）。以上周五收市價計，前者高位累計僅跌17%，後者跌足49%，點睇都係高寶抵博，BNP睇高寶目標價7.36元，打個5折都有3.68元。