學《食神》話齋︰「食物除咗好味之外，廚師嘅賣相都好重要。」大家從來無懷疑過食色性也嘅道理，所以《美女廚房》當然受落。不過歷來殺入廚房搵食的，大都是廚房佬而非「美女」！你梗話廚房佬從來冇靚仔。錯，只係你時間地點去錯。今日搵嚟3個美男廚，包你見過都會話：我唔只係想來食麵，而係想見你一面！
記者︰陸俊雄、葉雪芯
攝影︰周旭文、楊錦文
壽司界俊男 追女唔使煮飯
壽司界俊男來自威靈頓廣場內新開的「壽司囗囗」。皆因從前置地廣場賀菊（Kiku）內的日籍總廚向川哲，已轉投新陣營。Kuu經理Kevin說︰「的確我哋女客人較多，有因為Satoru而嚟，係熟客。我哋有套SushiOmakase，意思係交給我吧！女食客最鍾意Satoru為佢哋安排全個菜單。」
對壽司細心，但向川哲卻直言自己是大男人，他用廣東話說︰「返到屋企我唔會再整嘢食，追求前妻時都整過一兩次，但係煮意大利粉。」傳統上日本男人回家後不煮飯，所以沒有「煮飯的男人更得女人歡心」這概念，但他承認在香港做大男人不行︰「香港女仔有學識、搵好多錢，但太自我中心、太瘦，我喜歡BigAss。」向川哲22歲才在美國開始做學壽司，算起步遲。之後回東京學廚，7年前來到香港才正式學做壽司，「我在香港住滿7年，係香港人。」即使放假回東京，也到魚市場為餐廳找新鮮貨色︰「我鍾意咁，生活畀我好多靈感。我鍾意聽女客人講嘢，佢哋對健康飲食好有研究，學到嘢。」雖然說自己是大男人，但骨子裏卻細心，難怪女食客都對他如此着迷。
壽司囗囗（SuksiKuu）
地址︰中環威靈頓街2－8號威靈頓廣場1樓 查詢︰27910181
意大利奇洛 煮好菜搵老婆
女性友人說海景家福酒店7月來了個奇洛李維斯，筆者親眼看過後，覺得他更像意大利球星廸比亞路。更意外的，原來這位海風餐廳新總廚ClaudioDieli是意大利西西里人。早聽聞過那地方的人特別漂亮。
雖然曾是杜拜帆船酒店副總廚、中東的四季酒店總廚等，但Claudio幽默而且沒有架子。「我覺得香港女性很Sexy，有點像亞洲女人覺得外國白人好吸引一樣。而且亞洲人和意大利人是天下間最好的配搭。」他的妻子正是亞洲人。而他對製作食物和對女性有同一番見解︰「製作好的食物，要先思考，再選擇用不同材料磨合，繼而有個好的Presention，之後享受味道，最後還要賽後檢討。追求女人都是一樣。」
經理：請佢，靚仔係一個因素
他認同煮得一手好菜更能吸引異性︰「我就是因為Cooking而認識現在的妻子。」Claudio不肯認自己長得俊朗，還笑問女記者︰「你覺得呢？」但餐廳經理Ellen透露︰「我們聘請他除了他的廚技，外表吸引也是考慮因素。因為他，來多了很多女遊客，特別是意大利人。」連男侍應Kurt都說︰「Claudio鍾意行到人客面前問嘢食做得好唔好，特別係女食客好鍾意同佢傾偈。」公關則說Claudio其實經常口花花，不用說，我們的女記者就見識過了。
海風餐廳
地址︰尖沙嘴東部麼地道70號海景嘉福酒店B2
查詢︰27312870
瑞士菜黃秋生 JamieOliver係垃圾
黃秋生開餐廳做大廚？原來看錯了，他是31歲的靚仔廚師，與黃秋生相似度達95%！當中相差的5%，就是他比秋生哥更年輕有型。
人不風流枉少年，生得俊俏，天生就有本錢做個情場浪子，煮得一手好瑞士菜，卻從來不用以此為追女絕技，反而大堆女仔撲上身：「細個時，大把女仔追我，我扮Cool就得米。一腳踏兩船？點止咁少呀？我有幾隻腳。」餐廳多數以女客為主，但Jacques好謙虛，說女客多數是熟客、好朋友，千叮萬囑筆者不要說他是靚仔廚師，他最討厭這稱號：「你話我靚仔，即係得個樣無料到？我覺得JamieOliver係垃圾！講開又講，我女人昅得我好緊，即使啲客係為咗睇我，定係我睇女仔，都出唔到蠱惑！」原來，最後一句才是真話。
千揀萬揀揀中國女友
在香港讀國際學校、瑞士修讀廚藝，精通意大利文、德文、英文，但喜歡的還是中國女人：「外國女仔好大隻，又多腳毛，我頂唔順。中國女仔善解人意，又單純，邊有得比。」難怪他千揀萬揀，最終選定在荷蘭長大中國女友。
煮好菜，Jacques認為菜式不需要複雜，最重要還是材料好、質素好，他覺得這方面，選男女朋友亦一樣：「材料唔得，整到碟餸幾靚都一定唔好食。追你時玩乜花臣都得，甜言蜜語，最終都係要睇人品、合拍程度同相處。我和現任女友現在生活很簡單，無晒浪漫喇，但大家好夾，即係搵到好嘢食囉，會食一世。」
ReflexionNaturalDining
地址：銅鑼灣東角中心SogoClub12樓
查詢：28314866