錢嘉樂及李珊珊這對舊情人，早前應邀出席李連杰在上海舉行的「壹基金明星慈善賽」，兩人相處融洽有講有笑，有報道更指他們已秘密復合，昨日錢嘉樂在無綫錄影《2007中國功夫之星全球電視大賽─港、澳、台區選拔賽》時心情勁靚，不但撩女參賽者，更狂寸表演一指禪的武林高手動作「唔出得街」。
拍拖多年的錢嘉樂與李珊珊一年前宣佈分手，身邊的人無不感到可惜，不過近日這段感情似乎有起死回生的突破性發展，分手後甚少同場的錢嘉樂與李珊珊早前一同在上海賽車場出席慈善賽，兩人在鏡頭後笑意盈盈眉來眼去，有報道更指他們其實已經秘密復合，不知是真是假呢？
中指碎大石
錢嘉樂與陸詩韻昨日在將軍澳電視城主持《2007中國功夫之星全球電視大賽─港、澳、台區選拔賽》，他看來心情勁靚，在節目中經常跟陸詩韻及女參賽者開玩笑，除了大讚陸詩韻身材好，又口花花約對方食飯之外，在參賽名單中，唯一女參賽者張郁慈同樣被錢嘉樂戲弄，錢嘉樂對着她以半鹹半淡的普通話說：「如果你不是冠軍，我給你！你已經是我心目中的冠軍，你的電話號碼幾多號？」引得在場觀眾哈哈大笑。其後評判釋行燎大師表演一指禪，用中指劈開一塊石頭，錢嘉樂見狀即笑說：「大師呢個手勢唔出得街。」
錢嘉樂昨日直認近期心情愉快，他說：「係呀！近排好順利，工作又順利。」有傳他與李珊珊秘密復合，對此他說：「未，唔好聽雜誌亂講，今日唔知聽日事，單嘢都過去又提！基本嗰日係成班人一齊，好自然，你哋知我落場邊個都會教，總之所有嘢以工作為先，感情順其自然啦！」
自言是粗人
其後錢嘉樂被問到有沒有意思再追求李珊珊，他語帶雙關地說：「暫時冇特登追，大家知啦，我呢啲粗人，好直，尤其係朝頭早，淨係識練功，又不解溫柔，真係唔知點做。」
採訪：楊潔雯 攝影：陳慧安
