孫柏文作為一個淡友，見聯儲局喺禮拜五又出手，當然好㷫。禮拜六凌晨㷫到喺自己個blog度大罵特罵。點知，原來翻查自己個blog，我喺再之前嘅禮拜六，即係聯儲局第一次出手翌日，我都有大罵特罵。罵佢哋托市。我就喺發現呢個情況之際，突然覺悟，今日同大家分享。
其實，伯南克係想個市跌。大家冇睇錯，我再講多次，伯南克係想個市跌。
經濟學講資源分配
如果大家要知道前學者伯南克點解咁諗，就一定要墜入學者心態。所以，今日孫柏文就幫大家補習吓啲econ，重溫吓乜嘢係「價格」。
經濟學嘅神髓，就係講資源如何有效咁分配，最少資源得出最大效果。價格，對資源有效分配非常緊要。如果價格上升，就會吸引更多供應商去討好消費者；價格下跌，就會令供應減少，等唔會盲目生產繼而資源被浪費。伯南克一定係咁諗。
伯南克一定係諗，過去幾年，有錢嘅人好似對風險完全唔理，令好多唔應該借到錢嘅人，借到錢，唔應該借到咁多錢嘅人，借到好多錢。點樣都好，資本錯配，浪費資源。
伯南克一定係諗，社會向榮，資源浪費一定要停止。而可以令有錢嘅人自發地停止資本錯配，就係令「價格」下跌到應該嘅水平。市跌，即係等如價格下跌。伯南克想「價格」下跌，亦即係想個市跌。
市跌等如價格下跌
大家可能會問：「咁佢又出手？」問得好！伯南克一定係最驚「價格」下跌超過應該嘅水平overshoot，連冇參與有問題放債、投資活動嘅人都死埋。而喺恐慌性拋售、急速下調嘅情況之下，就最容易overshoot。所以伯南克想個市跌，不過慢慢跌，有秩序咁跌。
如果要手上有貨嘅人理性地拆倉，令個市慢慢跌，有班人伯南克一定要對付。呢班人，就係淡友。如果淡友參與拋空股票，贏錢，就會更大力再拋。伯南克一定覺得淡友令個跌市overshoot嘅機會大大提升，所以就喺標普500指數put輪到期計數嘅花旗國禮拜五開市之前，出手。
聽聞，花旗國好多淡友重傷，淡友拋空帶來嘅沽壓應該減少。今日，應該裂口高開，如果伯南克真係想個市最終下跌，大家應該識點做。
金手指網誌： http://phatdat.blogspot.com