皇后碼頭攻防戰結束，拆卸皇后工程進入倒數階段，八方噚日去中環，見到土木工程拓展署已派工人搭好棚架，相信不日就會正式郁手。皇后大限到，「本土行動」成員好肉緊，密切注視政府一舉一動，一直瞓身兼瞓街保衞皇后嘅朱凱廸，原來差啲要做逃兵，可能要轉去保衞都會駅！
朱媽媽購入都會駅
此話何解？有本土成員話畀八方知，原來朱凱廸媽媽早前被經紀游說，買入將軍澳都會駅一個單位。大家都知年幾前樓市走勢睇落唔錯，朱媽媽就放膽去馬，點知今年樓市卻好似唔多穩陣，朱媽媽擔心入錯市，心情忐忑，十分閉翳。
母親為層樓閉翳，做仔嘅都唔慌輕鬆，朱凱廸心情唔多唔少受影響，戰友恐防佢兼顧唔嚟，都盡量唔令佢太費神，又話如果真係有需要，寧願叫朱凱廸暫時放低皇后，全心處理家事，或者搵份正職，有必要時可以幫屋企供樓，揹起頭家。
原來皇后衞士唔止為保衞古蹟問題煩惱，家事仲令佢頭痛，八方慰問朱凱廸同佢家人，佢唔願多談家事，只係話已經事過境遷。對於媽媽入市佢冇意見，因為置業決定「一個願打，一個願捱。」據八方了解，全賴朱凱廸父親喺北角有個唐樓單位，喺朱媽媽為都會駅閉翳之際，朱爸爸當機立斷賣出唐樓套現數百萬元，問題迎刃而解，成家人安樂晒，朱凱廸亦避過唔使成為「樓蟹」一族，可以繼續瞓身保衞皇后。可見要做一個成功嘅街頭戰士，除咗要有堅定信念，屋企家底有時都幾重要。
中大畢業寫稿維生
朱凱廸𠵱家獨居，做freelance寫稿維生，佢話由於冇搬入都會駅，所以都冇特別過問層樓嘅事嘞，總之𠵱家會密切監察清拆皇后碼頭工程，若有異樣一定會追究到底，政府最好豎立透明圍板，方便全民監察，唔好黑箱作業亂咁嚟。朱凱廸喺中大讀書時讀文化研究，畢業後去過中東，之前做過傳媒。同佢交過手嘅人話，朱凱廸諗嘢好周詳，肯聽旁人意見，而且有自己見解，官員面對佢固然難纏，政客要抽佢水都唔易。