高官干預教院學術自由風波，聆訊多月曲終人散，四大主角：阿瑟王、羅范、前校長莫禮時同前副校長陸鴻基紛紛被叮走。其中莫禮時獲英國倫敦大學教育學院聘為教授，執埋啲手尾賣車賣樓，就返老家重執教鞭兼做研究。
未知夠唔夠找數
老莫居港31年，呢次執包袱都幾感慨，佢同八方飲咖啡時講開，離港會先同太太去澳洲探望女兒，9月尾先返英國開學，佢又話由於短期內都唔會返香港，所以沽出半山干德道豪宅套現。老莫98年以565萬買入地下連花園單位，面積約1,600呎，據知早前以過千萬易手，賬面獲利逾600萬元。
層樓成功脫手，老莫話揸開架積架就仲搵緊買家，佢話架車好大食，香港油價貴，相信較難賣個好價。老莫之前請大狀同政府打官司，賣樓賣車夠唔夠找數？佢話仲講緊數。
離別在即，回想對聆訊有咩遺憾，佢始終覺得審得唔夠全面，因為阿瑟王有冇講過rape，同埋羅范有冇同莫慕貞講炒人，始終唔係調查範圍。老莫寄語希望教院日後有光明前途，正常發展，咁佢同陸鴻基總算冇白白犧牲。