會考放榜之後，不少學生與家長四方奔走，爭奪學額，演出人生百態，有幾位放緊假嘅老師，回校幫手，對左丁山講咗一啲有趣故事。
A校位於小山丘之上，交通唔算方便。家長與學生在下大雨之時，坐的士匆匆趕至，一入門就問：「陣間點樣落番去？」老師話：「要行幾分鐘落去搭小巴。」學生阿媽立即講：「你哋間學校咁唔方便㗎，平時返學咪好麻煩！」老師為之氣結，心諗都未知收唔收你個仔，你嘈嚟做乜，況且你早知學校位置，做乜要趕嚟申請入學呢？
B校有美術設計科，學生與阿媽商商量量話好唔好讀，學生話：「畫公仔我鍾意呀，唔使讀書，淨係畫畫之嘛？」老師話：「唔係呀，你要讀番啲藝術史、設計理論噃。」學生話：「阿媽，咁麻煩，我唔讀。不如讀時裝啦，有靚女同學呀！」
藝術B有一間畫室，會考放榜後有位打扮入時嘅阿媽帶女上門話要學畫，位千金扎扎跳，眼睩睩，未坐低就話畫室冇電視嘅，悶啲喎！阿媽猛咁問有乜嘢學，一年之內佢位乖女會唔會識畫杜鵑、牡丹，要色彩鮮艷嘅。藝術B話：「對唔住，我唔收學生！」點知同時間有位衣着樸素，好鄉下嘅阿媽帶個仔入到嚟，操唔鹹唔淡廣東話，一聽而知係新移民，呢位阿媽問：「要不要一年才學懂畫蘋果與橙，我個仔幾好心機㗎。」呢位細路企定定，望住畫室內嘅石膏像。藝術B話：「我收你做學生啦，你先學素描。」香港阿媽聽到，立即嘈：「我冇錢畀學費呀，做乜收個男仔唔收我個女？」呢勻真係有理說不清，藝術B幾乎落荒而逃。
D校嚟咗幾個學生，又係有阿媽帶住（啲香港父親要返工搵食吖嘛，唔得閒陪仔女搵學校），呢啲學生真巴閉，有一位喝住阿媽：「都話唔讀㗎啦，走嚟呢度做乜！」阿媽居然誠惶誠恐咁話：「問清楚先啦，聽講呢間學校唔錯㗎。」有一位大發脾氣，話學校做嘢慢，阻住佢去銅鑼灣與同學食飯，佢阿媽立即同老師講：「唔該快啲啦，我個女趕時間……」老師感嘆曰：「見到呢啲學生，我都唔想教，想教佢哋阿媽先！」