股災呀！股災呀！港股噚日最多跌成900幾點，今勻股神出手都救唔到個市呀！
華華唔係亂噏，有「香港畢菲特」之稱嘅四叔李兆基，今個月八度入市買煤氣（003），可惜煤氣今次唔爭氣，四叔撐極都唔起，都係怪美國佬嘅次按風暴太勁，拖累全球股市，搞到香港畢菲特都頂佢唔住。
噚日，煤氣仲跟埋個市跌，差啲跌穿17蚊，最後收17.18，股價比起今個月8號18.08蚊嘅高位，跌咗5%。
前兩次出手 股價升15%
華華噚日睇港交所嘅大股東增減持資料，見到四叔由今個月頭開始，直至上個禮拜五（10號），連續8個交易日增持合共1812.7萬股煤氣，用咗3.25億銀，每股平均價要17.91元，持股量由40.39%增至40.65%。
不過，煤氣個價除咗四叔入市第二日（8月2日）升咗兩毫八（1.6%），之後都喺18蚊上吓落吓咁。同之前兩次四叔增持之後，煤氣變「氫氣」咁升上天冇得比。
話說今年6月尾至7月初，四叔先後8度泵水買煤氣，將股價由16個幾，谷到7月13號嘅18.96歷史新高，股價短短幾個禮拜勁升15%。
舊年2月，四叔又係連續8日買煤氣，嗰次煤氣個價由15.23低位，升到17.59銀嘅06年高位，升咗15.5%。
[email protected]