公民黨出擊年底區選campaign啓動，新星陳淑莊Tanya百足咁多爪，排戲讀書打官司之餘，地區活動都有佢份，佢嘅處女單張啱啱出爐，標題係「拉闊人生life@stages」，揚眉女子心事，係想講畀人知佢已踏入人生另一新階段。
傑哥屯門視察廁所
處女單張印6,000份，目標係門高狗大嘅山頂富豪，Tanya話希望大屋傭人手下留情，唔好一見到就當係一般宣傳單張丟咗，畀個機會佢入屋。公民黨喺新界西都蠢蠢欲動，新界西支部主席陳家洛噚日同地區發展主任李錦添，連同梁家傑一齊去屯門中轉屋寶田邨視察，見識吓該邨單位「迷你」廁所，梁家傑仲試坐個廁所，企入去後真係轉身都有困難，要求房委會改善。山頂豪宅個廁所，隨時大過寶田邨一個單位，公民黨服務真係跨階層。