煲呔新政府就任之初風平浪靜，點知帕布「回馬風」一吹，唔止吹到市面大混亂，連股市都吹冧埋，加上扎鐵工人工潮唔知點收科，有官員同八方講，估唔到新班子第一個暑假咁忙碌。罷工同股災睇嚟唔係一時三刻可以解決，煲呔同老婆北上暢遊黑龍江，呢兩壇嘢如何處理，係唐英年同曾俊華第一個考驗。
唐唐一向腳頭好
有AO話唐唐做財爺時成日俾人讚腳頭好，升職後先冧市，可見佢真係福星高照，不過花無百日紅，若然工潮擴大，佢呢個署理特首都好頭痛；至於鬍鬚曾一上場個市就起勢跌，AO話需否救市言之尚早，「唔使咁恐慌」，八方問佢，鬍鬚曾始終欠缺財金經驗，陳家強又剛離開象牙塔，兩人係咪應付得來？佢好有信心，話師傅一定睇實徒弟嘅。