扎鐵工人連日罷工，連續個幾星期喺土瓜灣靠背壟道打躉，嗰度平日人流稀疏，近排就日日幾百人晒馬，旺過旺角。扎鐵工人打算馬拉松式罷工，相信土瓜灣仲有一排熱鬧。八方噚日去探班，發現班「鐵漢」真係有備而來，有齊罷工三寶──啤酒、煙仔同碟頭飯，準備長期作戰。
「同無良老闆鬥長命」
呢班扎鐵大佬表面一盤散沙，據八方觀察，其實佢哋幾有紀律，每日依時依候，大約朝早10點鐘左右就抵達靠背壟道集合，好似開工咁準時，有人會先喺附近飲早茶，但由於冇工開，手停口停，所以班大佬都要睇住荷包，有個大大件嘅鐵漢叫盅排骨飯就一餐，「都唔知抗爭到幾時，𠵱家冇工開，所以一定要慳啲。留番啲彈藥，先至可以同無良老闆鬥長命。」
罷工工人除咗靜坐，仲會不時嗌兩句口號以振士氣，大班人喺度吹水，講到口亁就拎起支大啤飲兩口，好多人都買定幾罐啤酒傍身，見到平日一齊開工，同撈同煲嘅兄弟，仲會醒罐對方一齊啤一啤。唔知係口味相同定係貪方便，八方粗略統計扎鐵大佬多數飲陳法拉sell嗰隻啤酒，「可能係最新鮮嗰隻」反而少見，如果啤酒公司派位啤酒小姐到場，肯定生意滔滔。
幾位扎鐵大佬同八方講，佢哋唔係擔心生計借酒消愁，實情平日開工都會飲番杯。到中午食飯時間，土瓜灣一帶茶餐廳真係多得工人帶挈，茶餐廳擺滿枱凳喺行人路招呼佢哋，好多人一坐低就叫碟豆腐火腩飯，碟飯上枱，普通OL三個人食都夠，扎鐵係體力勞動，工人三扒兩撥就掃光，之後飲兩啖啤酒，個樣不知幾滿足。老實講，日捱夜捱都係想搵餐晏啫。
茶餐廳開「方便」之門
食飽飯，工人通常兩點零鐘就歸位繼續集會，職工盟不時帶領叫口號、唱歌激勵軍心，好多工人抽煙消磨時間，成條靠背壟道煙霧瀰漫，都算係都市一景。好多人認為扎鐵工人遊行示威阻塞交通，不過凡事總有兩面，土瓜灣一帶茶餐廳、士多，因為多咗工人幫襯食飯、買啤酒同煙仔，受惠不少，餐廳老闆更為工人開「方便」之門，佢哋人有三急可以借廁所一用。
既然要長期作戰，罷工工人已組成「糾察隊」，四圍去叫其他地盤工人響應罷工行動，每次歸來都受到工人英雄式歡迎，有扎鐵工人話，以前有工開，搵到錢，收工後會有好多節目，𠵱家要長期抗爭，真係要慳啲使，早啲返歸養足精神先可以長期抗爭，爭取最後勝利咁話。