97年香港回歸，內地省市送出大批奇珍異寶做賀禮，呢啲嘢似旅行買嗰啲手信，送禮者一番心意，收禮嗰個通常多得你唔少，事關收到仲要搵地方安置，港府接收大堆賀禮，都係求其擺埋一邊。民建聯蔡菜子好有心，記得當年特區政府收到成卅幾份賀禮，一直分散擺喺唔同地方，有啲地方市民難得一到，好似內蒙古自治區贈送嘅石雕，擺喺機場貴賓室入面，唔係VIP就冇機會望一眼。
外國賀禮待遇都係麻麻，蔡菜子憶述日本政府送過一批櫻花樹畀香港，點知政府醒目到將佢哋分別種喺唔同地方，香港市民好難見到好似日本一片櫻花樹嘅美景。蔡菜子為此約見行政署副署長翁佩雯，佢話連高官都唔知道所有紀念品擺放位置，建議政府設立專門展覽廳，下一步會去信老友曾德成局長反映意見。