王晶為咗力捧新一代晶女郎孟瑤，重拍70年奇女子狄娜主演嘅電影《七擒七縱七色狼》。噚日眾演員喺屯門開工，現年22歲、喺北京舞蹈學院畢業嘅孟瑤穿上三點式，大騷34D、26、36身段，扮演七色狼嘅曾志偉、張兆輝、林家棟、錢嘉樂、王祖藍、林子善同陳百祥將佢抱起，場面搞笑。
同邱淑貞睇齊
孟瑤喺片入面個名叫陳寶珠，可能佢嚟自北京，所以對寶珠姐同狄娜唔太認識，亦冇睇過狄娜嘅版本。問佢有冇親熱戲，孟瑤用普通話講話：「導演未跟我說，有需要我不介意。」身兼編劇嘅王晶就話孟瑤係佢力捧嘅晶女郎，問佢會唔會用當年力捧愛將邱淑貞嘅做法？王晶就話：「最起碼有咁嘅級數啦。」
另外，谷祖琳、關寶慧、梁敏儀同新人趙彤等噚日都喺現場，問小谷會唔會着三點式？佢話：「如果晶哥叫到一定着。」王晶聽到後就話：「小谷肯着，我加番場戲畀佢。」問小谷喪弟心情平復未？佢話：「之前冇機會講，多謝大家關心。」至於飾演孟瑤父親嘅志偉就笑住話六色狼係由佢訓練，點知佢哋睇中自己個女。
