今個禮拜初先講過，前8號仔副主席「着數哥」蘇澤光，以「私人理由請辭」後，終有着落，就係去台灣高鐵做獨立董事，但話口未完，就有戲劇性發展──台灣高鐵噚日召開新董事會，選出15席新董事，「着數哥」係其中一位，但獲選後着數哥隨即以個人因素（即係私人理由）請辭，吊詭同混吉指數達百分之一百！
做唔成寶島鐵漢
根據台灣中央社報道，台灣高鐵方面好「低調」咁同佢哋講，先前問着數哥嗰陣，佢係應承咗兼夾簽埋約，但就喺呢短短三日，佢決定去中國做嘢，擔心競業禁止（即係利益衝突）問題，決定唔do，而高鐵方面唔打算搵人補選。
查實響職場上，就算係應徵做個officeboy，應承咗人哋返工，都唔可以反口，着數哥咁樣，話嫁又唔嫁，做唔成「寶島鐵漢」，仲可能會影響到台灣商界對佢嘅睇法！