全球信心危機，基金出現大擠提，觸發全球大股災，恒指噚日就可以大跌近900點，直情係一場「大殺戮」，「危」已出現，「機」還會遠嗎？
基金今次面對的「危」，係全面得嚟仲好嚴重嘅，不得不進行大斬倉，一直被號稱基金愛股嘅，現時就成為率先斬倉嘅對象。「晒士」越大，流通性越強嘅大價股，亦係頭嗰批被開刀，同埋沽得最急嘅。
不過，正當基金急急拋售套現，令到人心惶惶之際，好似滙控（005）、中移動（941）同中國人壽（2628）等大價股，一日嘅成交成40多至60多億元，大買家係邊個？當然唔會係你同我，其實咪又係基金。
基金出咗事，要自救，但亦有基金坐得好穩，仲可以施施然吼低買平貨。有一個可能性，就係佢哋仲會乘人之危，落井下石，質冧個市，然後慢慢接啲斬倉貨，仲可以越買越低。
恒指由高位23500多點掉頭急挫，十幾日之內，大跌成3000點，支持位穿咗一個又穿一個，蓄勢醞釀大半年先開展嘅大升浪，幾下手勢就打回原形，仲蝕入肉，呢場財富大轉移嘅第一波，相信已接近尾聲，等拋售完成，一次急勁嘅反彈就會出現。
博反彈要揀好股
家吓股市滿目瘡痍，頹垣敗瓦，場面猶如被恐襲，但有危就有機，殺戮過後，肯定有唔少「珠寶玉石」埋在瓦堆中，只要用心發掘，執番兩三件寶物，博第日反彈，好易賺一個開。
唔好話大價股跌得急，其實大跌市之前，好多股仔已跌到唔清唔楚，家吓俾個市再累一累，唔少股仔再躀多鋪，夾夾埋埋，跌咗6至8成，既然可以由1元跌到落兩三毫，反彈一倍，上番四五毫亦好易。
不過，博反彈，要揀好股，同埋有實質業績支持嘅。跌市冇理智，好股壞股一樣照跌，好股跌過龍，反彈亦會較急，例如高寶（274）、宏安（1222）、金龍（329）及位元堂（897）等，都屬呢類；至於概念股同消息股，個人有心水，小玩亦無妨。