美國次按風暴觸發信貸危機，拖累環球股市狂插，港股暴瀉703點。網友狂炳美國佬累街坊，Brianli話：「美國人碌爆卡，要全世界找數，離晒譜！」
Hukuro亦好㷫：「全世界股市都俾美國搞到風聲鶴唳。」蟹貨一籮籮話：「一句講晒，華爾街打噴嚏，全世界即刻傷風。」膠波仔就話：「中國賣次貨玩具係衰，都係小數目；美國佬賣次按呃全世界幾萬億錢，仲衰啦。」
晴天公仔好唔明：「人哋美國佬前晚跌200幾點，香港噚日就跌600幾。噚晚美國都係又瀉百幾啫，恒指使唔使跟住跌得咁誇張呀！」
新手律居最慘：「一入市就損手爛腳，今日仲入埋深切治療部，難道天亡我也？」破軍仔仔認為：「唔理賺定蝕，手持現金，靜候良機。」Dinoeo更睇淡後市：「大戶要抽水回老家救市，全球大擠提，股市回天乏力，港股大勢已去！」
http://www18.discuss.com.hk/viewthread.php?tid=5031357&extra=page%3D17