花旗股市冇力彈不過有力插，道指13000守唔住，沽盤源源不絕，驚乜？已經唔係次按危機，因為連冇乜做次按嘅按揭大機構都一間又一間話唔掂，個個都話班唔到水，日日俾人Call孖展，應付贖回，咁搞落去，邊度有咁多錢畀？就只有一樣嘢做，就係留多啲錢喺身邊，等人哋Call同贖回，亦只有一個方法，就係賣家當，邊啲嘢最易套現，邊個場最易將啲貨出手，就喺邊度賣，昨日區內股市跌得咁勁，沽得咁狠，就係呢個原因。
有人問俊樺，咁平都沽？係，咁平都沽，因為𠵱家係講Survival（存亡）嘅問題，而唔係講賺蝕嘅問題，人哋同你攞錢，冇得畀就要執笠，仲講乜嘢賺蝕，基金沽嘅係乜嘢？主要都係套現能力高嘅大藍籌。再講，「咁平」都沽係𠵱家睇啫，遲啲可能平到你唔信。
駿威C輪5984：駿威（203）昨收3.23元，跌4.7巴仙，貼住條250日線收市，喺低位嘅承接力都好強，有機會反彈試3.48元，可小注買入C輪5984短炒，昨收15.9仙，有效槓桿率6.3倍，正股升上3.48元，5984應該喺25仙樓上，正股跌穿3.10元止蝕。