成語「驚弓之鳥」大家都知點解，噚日發生咗個廿一世紀版本。話說爭取保留皇后碼頭嘅司法覆核塵埃落定後，政府不日之內就會將碼頭拆骨，切開上蓋、柱躉，再運去大嶼山存放，等待重置，「本土行動」成員雖然被迫撤離皇后，但仍然金睛火眼昅到實，噚日有人緊急向八方報料，指一架大型工程車殺到碼頭，隨時有所行動，皇后大限已到！
八方火速到場一睇，果然發現有架吊雞車停喺大會堂旁邊個巴士站候命，不過就唔見有大舉開工迹象。皇后危急存亡，本土行動成員應該盡最後機會，游說班工人手下留情，仗義每多屠狗輩，話唔定清拆工人加入保衞皇后。點知工人同八方講，佢哋唔係去皇后開工，只係做大會堂工程；八方向大會堂方面查詢，副經理陳淑霞話由於維修中央冷氣工程完成，所以call架吊雞車嚟運走部臨時冷氣機，「拆碼頭係土木工程拓展署嘅事，同大會堂冇關㗎。」聽到陳經理咁講，八方當堂鬆一口氣，原來大家杯弓蛇影，不過政府郁手係遲早嘅事，只係時辰未到啫。