噚日係上市公司公佈業績嘅高峯期，單喺晏晝搞記者會嘅，就有成8間公司咁多，包括中移動（941）、交行（3328）、中電（002）、長建（1038）等藍籌公司，咁好自然，非藍籌公司會被忽略。
華華噚日去咗工銀亞洲（349）嘅記者會，初初去到嘅時候，場面就有啲冷清，未正式開始前，到咗嘅記者數埋唔夠10個，估計係因為啲記者會多到傳媒應接不暇。
朱琦唔想離開香港
記者會正式開始之後，部份記者先至陸續趕到嚟；工銀亞洲董事總經理兼行政總裁朱琦好客氣，話知道好多公司一齊開記者會，感謝傳媒撥冗嚟採訪佢哋。
朱琦加入咗工銀亞洲5年、嚟香港工作13年，之前有傳媒話佢會返工行工作，但佢話好鍾意香港，暫時冇咁嘅打算。