星級化妝師RickChin，平時見佢揸起化妝掃，掃掃掃，化色彩為神奇。但點都估唔到佢揸起菜刀，剁剁剁，刀法如此利落；揸起鑊鏟，炒炒炒，鑊氣果然夠勁；論廚藝功架，同樣有星級水準，佢話：「煮餸同化妝一樣，要識Balance。」經常出Trip的Rick，食過唔少地方美食，今日就請佢為大家示範一餐飯煮四國菜。
記者：趙珮倩
攝影：梁細權
家人開餐廳偷師最易
因屋企人開餐廳關係，Rick4、5歲就近廚得煮，自小睇埋師傅點煮嘢，自自然然就識煮，「細個冇人得閒煮咪自己煮，到𠵱家都好享受煮嘢食，加上我唔食得味精，一食就敏感，所以好少出街食飯，不過就鍾意向大廚偷師，每個師傅都有自己一套，喺佢哋身上學到好多嘢。」
心如栢芝試過菜
Rick是不少紅星的御用化妝師，有邊個有口福試過佢手勢呢？「林心如之前嚟我屋企食飯，我煮咗凍蟹、沙嗲牛肉炒芥蘭同芋泥燕窩，佢食到唔停口。另外，我鍾意煲湯，我信湯水對皮膚好，張栢芝都有飲過我煮的燕窩湯。」
Rick煮食調色之道
一餐飯要有不同味覺及口感，而味道又不可相差太遠，正如眼影同唇膏顏色要Balance，餸菜顏色配搭要靚。
紅色：預防心臟病。
綠色：加速腸道蠕動。
白色：防止膽固醇形成。
橙黃色：修補細胞組織。
直擊Rick屋企廚房
經常要出Trip工作的Rick，去到外國買得最多的不是化妝品，原來是醬料，打開他家的雪櫃，就發現大大小小、一樽二樽不同種類的醬料。雖然他不是經常煮食，但廚房內的用具及食材都一絲不苟，一於睇睇有乜筍嘢！
1.法國買香蒜醬
「最啱用嚟煮龍脷柳又或者撈意粉。」
2.英國買薑醬
3.薄荷青瓜醬
4.小紅莓醬
「煮西餐好多時會用，特別係小紅莓醬，用來煮鵝肝好正。」
自製印尼Sombak醬
「在峇里島學整，用豬油炸過的大蒜、蒜頭混合指天椒，比例為1湯匙大蒜加1湯匙蒜頭，指天椒可隨喜好而決定份量，特別香口好惹味，當地人鍾意用嚟撈飯食。」
工欲善其事，必先利其器，用刀方面，Rick都十分講究，唔會貪平買套裝，「揀刀講手感，啱Feel就買；斬刀要夠重手；西式刀要夠鋒利。」
打開廚房的儲食櫃，琳瑯滿目的亁貨、罐頭、酒類……恍如小型超市，不過杯麵就欠奉，「我食嘢鍾意要有煮的過程，冲個杯麵太簡單喇！」
泰式 雞蝦柚子沙律
0hr25min
4人份量
材料：虎蝦6隻、雞柳3條、洋葱1/3個、柚子1/2磅、印尼Sombak醬、鹽/糖/胡椒粉適量，指天椒亁2隻、魚露1/2茶匙、黑椒碎/柚子醋少許、雞醬2湯匙
做法
1.虎蝦去頭剪腳挑腸；雞柳以鹽、糖及胡椒粉略醃；柚子撕細粒備用。
2.虎蝦以猛火烚熟去殼後過冷河；雞柳煎熟切幼條。
3.將所有材料混合，加入魚露、黑椒碎、柚子醋、雞醬及Sombak醬拌勻即成。
貼士
虎蝦比海蝦肉質較實，適合用來做沙律。此外，平時用不完的指天椒可長期擺放在雪櫃，待水份徹底抽亁後，變成指天椒亁。
台式番茄蛋湯
0hr30min
4人份量
材料：雞蛋3隻、番茄4個、虎蝦頭6隻、鹽/糖/胡椒各少許、蒜茸/薑絲各適量
做法
1.爆香蒜茸及薑絲，將番茄炒腍，逐少灑上鹽及糖調味。
2.將已炒好的番茄放入鍋中，加入5碗水和蝦頭滾大約25分鐘，下鹽、糖及胡椒調味。
3.雞蛋拂勻，打圈倒落湯中成蛋花後即熄火。
貼士
揀番茄要揀全個紅透，聞到有茄香，頂部呈青色的則又酸又淡，咪揀！
越式鵝肝炒芥蘭苗
0hr10min
4人份量
材料：法國鵝肝40克、芥蘭苗1/2斤、鹽/糖/蒜茸少許
做法
1.爆香蒜茸，下芥蘭苗略炒。
2.加入鵝肝兜勻，下鹽及糖調味即可。
貼士
是常見的越菜之一，鵝肝可配搭炒任何時菜，唔用芥蘭苗，可以用生菜及通菜都得。
中式山渣骨
0hr20min
4人份量
材料：一字排骨1/2斤、山楂餅5筒、指天椒2隻、蒜茸/鹽/糖/胡椒粉各少許、茄汁1湯匙、麻油幾滴、豉油1/2茶匙
做法
1.排骨以鹽、糖及胡椒粉略醃。
2.爆香蒜茸及指天椒，下排骨炒至8成熟，盛起備用。
3.山楂餅用熱水浸蓋面，壓爛成山楂汁，加入茄汁、麻油、豉油、鹽、糖及胡椒粉煮勻，排骨回鑊，兜勻上碟。
貼士
排骨回鑊後要不停兜炒約1分鐘，令每件排骨充份吸收到山楂汁。
買定料明日教你煮餸
雜錦魚生飯
選購自己喜歡吃的日本急凍刺身每款3隻或3片、日本米300克、壽司醋60克
稻庭冷烏冬
稻庭烏冬80克、烏冬用木魚湯1包
茶壺湯
門鱔1/2條、松茸2個、三葉2片、青檸1/4個、木魚花500毫升、昆布4至5片、味醂/日本清酒/日式豉油各少許
八月門鱔最當造，但門鱔極多幼骨，要以𠝹牛丸花般的細密方式將魚肉起骨，頗花工夫要有耐性。
