奧運馬術預賽搞到馬會CEO應家柏（EB）好唔得閒，難得佢肉體上分唔到身，精神上都仲可以瓣瓣兼顧，六神合體。八方近日同佢吹水，講起已經開鑼嘅英超，曾經打過職業足球嘅EB，一講到波就鬼打都冇咁精神。英超首輪曼聯慘遭細球會雷丁迫和，香港咁多紅魔鬼擁躉，八方恭喜EB，馬會一開季就贏到開巷啦，EB就話未收到手足通知，唔敢講係唔係旗開得勝。
潑英超伯明翰冷水
英超今季多咗個香港班主，富商楊嘉誠收購咗升班馬伯明翰，八方以為香港球迷唔多唔少會捧吓伯明翰場，落多少感情飛。點知EB潑冷水，佢話除非伯明翰有港腳或者國腳，先會帶起香港球迷投注意欲，否則真金白銀落飛嘅香港球迷唔會感情用事，加上據佢所知，伯明翰領隊布魯士作風好硬淨，已經講明用人排陣由佢話事，唔到第二個管，班主都唔好咁多聲氣。
講完一輪波經，佢同八方講番老本行賽馬。繼香港賽馬彩池成功殺入拉斯維加斯賭場之後，英國市場亦都漸見眉目。馬會最近接觸過英國幾間博彩公司，希望可以透過佢哋嘅街外投注站播香港馬，接受英國馬迷落注，EB透露𠵱家只差啲稅務細節問題未傾掂，不過佢對成事好樂觀，睇嚟好快有好消息。
雖則賽馬係殖民地時代已有嘅玩意，不過香港賽馬節奏快速，鍾意high住tea睇馬嘅英國人未必好熱衷落注，正如應家柏都好怕睇中東嘅賽駱駝。佢同八方講，有次接受一位酋長邀請去睇駱駝大賽，去到先知條賽道「長過萬里長城」，於是乎起跑冇耐，佢就借故返酒店冲個凉，之後先返比賽現場，點知場賽事仲未跑完，搞到應家柏O晒嘴，香港賽馬速戰速決，眨吓眼跑完，一場駱駝賽嘅時間夠馬迷收埋錢去揼骨㖭啦。
合成相贈約旦公主
奧運馬術預賽結束，由於今次身兼國際馬術聯會主席嘅約旦公主Haya親臨視察，所以馬會上下都好緊張，送走公主大家先鬆一口氣，八方幾日前key咗公主個樣落張旋轉木馬相上面，據聞有關方面覺得幾得意，將張合成相送畀公主留念，八方希望公主鍾意啦。