呢對Twins雖然好似樣，但性格就各走極端，大孖就黐家兼顧家，細孖就朋友至上日蒲夜蒲。不過，呢排佢哋就不知幾合拍，無他，皆因佢哋齊齊入咗部TOYOTANoah，8座位，坐齊人十足小型旅行團，家庭樂定係出去威都一樣Fit。佢哋話最正係內櫳夠百變，唔落車都咁好玩。
記者：黎頌詩
攝影：陳盛臣
Model：Catherine
唔玩花臣
只要大家稍為留心，就會發現呢幾年馬路上家庭MPV嘅勢力日漸壯大，有啲車仲有環保減稅優惠，實在啱晒要求多多嘅香港人。今次加入戰團嘅係TOYOTA新一代Noah，外觀沿用上一代方匣子造型，睇起嚟較為平實，車頭照明跟霧燈組成兩邊相當巨型嘅頭燈，中間鬼面罩用粗橫條裝飾，配合大型的車身，充滿粗獷感。今次由水貨車行引入嘅2.0X入門版，內櫳一樣以簡潔取勝；前排座位兩側車窗設計獨特，開揚感十足。錶板及中控台都集中於司機位的左前方，鋪排亦以最簡單為主，勝在易明，駕駛經驗唔多嘅大細孖都一摸上手。最正係由於中控台位置向上推，前排座位中間更多了個置物空間。
錫晒老人細蚊仔
內櫳變化靈活，可以話係Noah嘅一大賣點，明顯喺家庭需要上花過心思，座位變化花臣多之餘，門的開幅有730mm，上貨上人都夠晒位。而車身的重心相當低，腳踏夠闊夠大，離地僅360mm，擺明錫住細路仔同老人家。話明賣點係家庭車，絕對唔係夠大就當交貨。
全新設計的2.0公升DualVVT-i引擎，在提高車輛嘅運轉效率之餘亦減低燃料嘅消耗，平均耗油量係13.4km/L。大細孖就話要孖住劈入龜背灣，於是呢架巨無霸就鑽入多彎路窄嘅大潭道。估唔到大大嚿嘅佢起動暢順，加速反應都夠敏捷，跟住不停掟彎，平穩得嚟都相當靈活，性能果然更見出色。
8人排排坐
Noah標榜係8人車，睇真3排座位，8個大人嘅話似乎逼逼哋，有大有細就差唔多。
轉小小好上落
咦，原來中間座位可以轉，轉少少，唔單止上落車時方便照顧小朋友，就連老人家都好啱使。
轉個面開Party
再轉盡啲，180°面對面，開小差好時機，姨媽姑姐八八卦卦，同小朋友齊齊玩都掂！
變睡床大覺瞓
中後排椅背完全拉平變大床，點止可以瞓番陣，打斛斗都無問題。
擺明扮貨車
中排推前、後排拉起，尾廂跟內櫳相連，騰出最大載貨空間，搬巨型家具無難度。
TOYOTANoah規格
引擎：1,986c.c.直4DOHC
馬力：143ps/5,600rpm
扭力：19.8kgm/3,900rpm
傳動：7前速無段變速自動波
查詢：富利堡（28776700）